২ অক্টোবৰত দেশবাসীয়ে জাতিৰ পিতা মহাত্মা গান্ধীৰ জন্ম জয়ন্তী পালন কৰাৰ সময়তে কলকাতাৰ পূৱ প্ৰান্তৰ কাচবাত অখিল ভাৰতীয় হিন্দু মহাসভাই আয়োজন কৰা পূজাই দেশৰ লগতে অসমতো সৃষ্টি কৰিছে তীব্ৰ প্ৰতিক্ৰিয়াৰ। অখিল ভাৰতীয় হিন্দু মহাসভাই বাপুক দেৱী দুৰ্গাই বধ কৰা অসুৰ (মহিষাসুৰ) হিচাপে প্ৰদৰ্শন কৰাৰ পিছতেই এই বিষয়টোক লৈ তীব্ৰ প্ৰতিক্ৰিয়াৰ সূত্ৰপাত হৈছে। জাতিৰ পিতাগৰাকীক বিকৃতৰূপত উপস্থাপনক লৈ সৰ্বত্ৰে সৃষ্টি ষপ্টপহৈছে প্ৰতিক্ৰিয়াৰ। বিষয়টোক লৈ বিজেপিক বাদ দি অসমৰ বিৰোধী আৰু বাওঁপন্থী প্ৰতিটো দলে প্ৰতিক্ৰিয়া প্ৰকাশ কৰা পৰিলক্ষিত হৈছে। চি পি আই এমৰ ৰাজ্যিক নেতা ইছফাকুৰ ৰহমানে বিষয়টোত প্ৰতিক্ৰিয়া প্ৰকাশ কৰি কয় যে, মহাত্মা গান্ধীক নস্যাৎ কৰাৰ বাবেই এই ধৰণৰ এক ষড়যন্ত্ৰ আৰম্ভ কৰিছে হিন্দুত্ববাদী সংগঠনবোৰে। মহাত্মা গান্ধীক আতৰায় চাভাৰকাৰ, নাথুৰাম গডছে আদিক দেশৰ 'হিৰো' বনোৱাৰ উদ্দেশ্যৰে হিন্দুত্ববাদী সংগঠনবোৰৰ নেতৃত্বত সমগ্ৰ দেশতেই আৰম্ভ হৈছে এই ধৰণৰ ষড়যন্ত্ৰৰ।