સુરેન્દ્રનગર જિલ્લાના લખતર તાલુકાનાં ઓળક ગામે ખેતર રાખી ખેત મજૂરી કરતો દાહોદ જીલ્લાના જળખરીયા ગામનો માવી સુફીયાભાઇ જેઠાભાઇ નામનો 40 વર્ષનો યુવાન તેની દિકરી સાથે ઢાંકી નજીક આવેલ કેનાલમાં ન્હાવા માટે ગયો હતો. યુવક ન્હાવા પડયા બાદ કેનાલમાંથી બહાર નીકળી ન શક્તા અને ડૂબવા લાગતા દિકરીએ પિતાને ડૂબતા જોઇ બચાવો, બચાવોની બૂમો પાડી હતી તે સાંભળી લોકો એકઠા થઇ ગયા હતા. પરંતુ યુવક ડૂબી ગયો હતો. બનાવની પોલીસને જાણ કરતા પોલીસ, ઇન્ચાર્જ મામલતદાર વિગેરે દોડી આવ્યા હતા અને સુરેન્દ્રનગર નગરપાલીકાની ફાયર વિભાગની ટીમને જાણ કરતા સુપરવાઇઝર દેવાંગ દૂધરેજીયા તરવૈયાઓની ટીમ સાથે દોડી ગયા હતા. અંતે યુવકની લાશ બહાર કાઢવામાં આવી હતી. પોલીસે લાશનો કબજો મેળવી પી.એમ.માટે મોકલી વધુ તપાસ હાથ ધરી છે.