બોડેલી તાલુકાના મૂળાધર પાસે ટીંબી ગામે સવારે એક સાથે ચાર કાચા મકાનોમાં આકસ્મિક આગ લાગી હતી . જેમાં ઘર વખરી , અનાજ સહિત તમામ સામાન આગમાં બળીને ખાક થઈ જતાં ચારેય પરિજનોને લાખો રૂપિયાના નુકશાન સાથે ઘર વિહોણા બન્યા હતા ટીંબી ગામે રહેતા તેરસિંગભાઈ રાઠવા , નટુભાઈ રાઠવા લક્ષનભાઈ રાઠવા , રમેશભાઈ રાઠવાના ઘરોમાં સવારે આકસ્મિક આગથી જોત જોતાંમાં આગ વિકરાળ બની હતી . સ્થાનિક લોકો દોડી આવ્યા હતા . ઘરના સભ્યો ઘર બહાર દોડી આવ્યા પણ કોઈ સામાન લેવાનો સમય પણ મળ્યો નહિ . બોડેલીથી ફાયર ફાઇટર બોલાવતા આગ પર કાબુ મેળવ્યો તે પહેલાં બધું જ રાખ થઈ ગયું હતું . અનાજ , ઘર વખરી , રોકડ રૂપિયા , દાગીના મળી લાખો રૂપિયાનું નુકશાન થયું હતું . સરપંચ સહિત આગેવાનો દોડી આવ્યા હતા . હવે તંત્ર અસરગ્રતોને તત્કાળ સહાય કરે તેવી માંગ ઉઠી છે .