ধেমাজি জিলা ছাত্ৰ সন্হাৰ অন্তৰ্গত শক্তিশালী আঞ্চলিক সমিতি জীয়াধল আঞ্চলিক ছাত্ৰ সন্হাৰ নৱম বাৰ্ষিক অধিৱেশনখনি আজি পুৱতি নিশা সফলতাৰে সামৰণি পৰে ৷ ধেমাজি জামুগুৰি উচ্চ মাধ্যমিক বিদ্যালয়ৰ খেলপথাৰত অনুষ্ঠিত অধিৱেশনৰ কালি পুৱা পতাকা উত্তোলন , শ্বহীদ তৰ্পণৰ পিছতে দুপৰীয়ালৈ অনুষ্ঠিত হয় প্ৰতিনিধি আৰু বিষয় বাচনি সভা ৷ ইপিনে সন্ধিয়া শিক্ষাবিদ বিপিন বৰাৰ সভাপতিত্বত আৰম্ভ হোৱা মুকলি সভাত সদৌ অসম ছাত্ৰ সন্হাৰ সাংগঠনিক সম্পাদক মণ্টুৰাজ বৰুৱা , ৰাজ্যিক কাৰ্যনিৰ্বাহক ৰাজীৱ গগৈ , ডেভিড হাজৰিকা , ধেমাজি জিলা ছাত্ৰ সন্হাৰ সভাপতি দীপক শৰ্মা , সম্পাদক কল্যাণ গগৈ , উপসভাপতি ৰবি কছাৰী , শিক্ষাবিদ দুলাল দত্তকে ধৰি কেইবাজনো  বিশিষ্ট ব্যক্তিয়ে অংশ লয় ৷ জীয়াধল আঞ্চলিক ছাত্ৰ সন্হাৰ বিদায়ী সভাপতি সৌৰভজ্যোতি বৰুৱাই  আদৰণি ভাষণ আগবঢ়োৱা মুকলিসভাৰ পিছতে  অনুষ্ঠিত হয় বৰ্ণিল সাংস্কৃতিক অনুষ্ঠান ৷ প্ৰায় ১০ সহস্ৰাধিক দৰ্শকৰ উপস্হিতিত আজিৰ পুৱতি নিশালৈ  ভিন্নসুৰীয়া গীত মাতেৰে আপ্লুত কৰে জনপ্ৰিয় উদীয়মান গায়ক সান্নিধ্য ভূঞাই ৷ উল্লেখযোগ্য যে এই বাৰ্ষিক অধিবেশনতে তনুজ কছাৰীক সভাপতি আৰু ভাৰ্গৱজ্যোতি বৰুৱাক সম্পাদক হিচাপে লৈ জীয়াধল আঞ্চলিক ছাত্ৰ সন্হাৰ  এখনি শক্তিশালী কাৰ্যনিৰ্বাহক  গঠন কৰা হয় ৷