બનાસકાંઠા જિલ્લામાં સ્ટેટ મોનિટરિંગ સેલ (SMC) એ ડીસા તાલુકાના ગલાલપુર ગામ પાસે અત્યાર સુધીની સૌથી મોટી કાર્યવાહી કરી છે. પોલીસે રૂપિયા 1 કરોડ થી વધુનો વિદેશી દારૂ ઝડપી પાડીને રાજ્યમાં ચાલતા મોટા નેટવર્કનો પર્દાફાશ કર્યો છે. આ દરોડામાં 5 આરોપીઓની ધરપકડ કરવામાં આવી છે. અને બે શખ્સો ફરાર છે.

SMCને મળેલી બાતમીના આધારે ડીસા-ધાનેરા હાઈવે પર ગલાલપુર ગામ પાસે વોચ ગોઠવવામાં આવી હતી. શંકાસ્પદ વાહનોને આંતરીને તપાસ કરતા વિદેશી દારૂનો જંગી જથ્થો મળી આવ્યો હતો.

પોલીસે કુલ રૂપિયા 1 કરોડ 9 લાખની કિંમતનો ભારતીય બનાવટનો વિદેશી દારૂ જપ્ત કર્યો છે. દારૂ ઉપરાંત, તેની હેરફેર માટે વપરાતા 3 મોટા વાહનો, 7 મોબાઈલ ફોન અને રોકડ રકમ સહિત કુલ રૂપિયા 1 કરોડ 52 લાખથી વધુનો મુદ્દામાલ કબજે કરવામાં આવ્યો છે.

સ્થળ પર થી ધરપકડ કરાયેલા 5 શખ્સો રાજસ્થાન ના બાડમેર જિલ્લાના વતની હોવાનું પ્રાથમિક પૂછપરછમાં જાણવા મળ્યું છે, પોલીસ સબ ઇન્સ્પેક્ટર સી.કે. સિસોદિયા અને તેમની ટીમે આયોજન બદ્ધ રીતે આ દરોડો પાડીને દારૂનું મોટું કન્સાઈનમેન્ટ પકડ્યું હતું..

તપાસમાં ખુલાસો થયો છે કે આ દારૂ પંજાબ ના પટિયાલાથી સપ્લાય કરવામાં આવ્યો હતો અને તેને કચ્છના નખત્રાણા સુધી પહોંચાડવાનો હતો. જોકે, પોલીસની સતર્કતાને કારણે આ જથ્થો ગંતવ્ય સ્થાને પહોંચે તે પહેલા જ ઝડપાઈ ગયો..

હાલમાં 5 આરોપીઓ પોલીસ રેકોર્ડ પર છે, પરંતુ આ સમગ્ર કૌભાંડના મુખ્ય સૂત્રધારો હજુ પણ પોલીસ પકડથી દૂર છે, પોલીસે ગુનો નોંધીને વધુ તપાસ હાથ ધરી છે..