ડીસામાં રાત્રે લાયન્સ હોલ પાસે રીક્ષા પલટી ખાઈ જતા અકસ્માત સર્જાયો હોવાની ઘટના સામે આવી છે. અકસ્માતમાં રીક્ષા ચાલકને ગંભીર ઈજા પહોંચતા આજુબાજુના લોકોએ દોડી આવી સારવાર અર્થે સરકારી હોસ્પિટલમાં ખસેડ્યો હતો.

ડીસામાં તહેવારોના સમયે બજારમાં ભારે ભીડ જામી હતી. તે દરમિયાન એક રીક્ષાચાલક રીક્ષા લઈને બગીચાથી પાટણ હાઈવે તરફ જઈ રહ્યો હતો અને લાયન્સ હોલ પાસેથી પસાર થઈ રહ્યો હતો. તે સમયે અચાનક સ્ટેયરીંગ પરથી કાબુ ગુમાવતા રીક્ષા પલટી ખાઈ જતા અકસ્માત સર્જાયો હતો. શહેરના ભરચક વિસ્તારમાં રીક્ષા પલટી ખાઇ જતાં અફરા-તફરી સર્જાઇ હતી.

અકસ્માતને પગલે આજુબાજુના લોકો દોડી આવ્યા હતા. જ્યારે રીક્ષા નીચે દબાઇ જતા ગંભીર રીતે ઇજાગ્રસ્ત રીક્ષાચાલકને બહાર કાઢ્યો હતો. તેમજ અન્ય રીક્ષામાં બેસાડી તેને સારવાર અર્થે સરકારી હોસ્પિટલમાં ખસેડ્યો હતો.