গোলাঘাটৰ খুমটাই সমষ্টিত আজিৰে পৰা অনুষ্ঠিত হৈছে আন্তঃ গাঁও পৰিচ্ছন্নতা প্ৰতিযোগিতা । খুমটাই সমষ্টিৰ বিধায়ক মৃণাল শইকীয়াৰ উদ্যোগত জিলা পৰিষদ এলেকা ভিত্তিক অনুষ্ঠিত হৈছ এই প্ৰতিযোগিতা । খুমটাই সমষ্টিৰ ৪ খন জিলা পৰিষদৰ অন্তৰ্গত ১৪৮ খন ৰাজহ গাঁৱে অংশ লৈছে এই প্ৰতিযোগিতাত। ঐতিহাসিক ৰহঢলা পথাৰত মৃণাল শইকীয়াই নিজে হাতত ঝাড়ু লৈ আজি শুভাৰম্ভ কৰে প্ৰতিযোগিতাখন । মাৰ্চৰ প্ৰথম সপ্তাহত প্ৰত্যেকটো জিলা পৰিষদত উপস্থিত থাকি গাঁও সমূহ পৰ্যবেক্ষণ কৰি মুখ্যমন্ত্ৰীয়ে ঘোষণা কৰিব ফলাফল । সমষ্টিৰ বাহিৰৰ তিনিজনীয়া চাৰিটা দলক দিয়া হ'ব বিচাৰকৰ দায়িত্ব। প্ৰশাসনিক বিষয়া,সংবাদ মাধ্যমৰ লোক,আৰু এগৰাকী সামাজিক ব্যক্তি থাকিব বিচাৰকৰ দলত । প্ৰথম পুৰষ্কাৰ এক কিলোমিটাৰ গ্ৰাম্য পথ নিৰ্মাণ,দ্বিতীয় পুৰষ্কাৰ ১০ লাখ টকাৰ উন্নয়নমূলক আঁচনি,তৃতীয় পুৰষ্কাৰ ৮ লাখ টকাৰ উন্নয়নমূলক আঁচনি,চতুৰ্থ পুৰষ্কাৰ ৫ লাখ টকাৰ উন্নয়নমূলক আঁচনি আৰু পঞ্চম পুৰষ্কাৰত থাকিব ৩ লাখ টকাৰ উন্নয়নমূলক আঁচনি । আনহাতে আন্ত:বাগিছা পৰিচ্ছন্নতা প্ৰতিযোগিতাৰ প্ৰথম পুৰষ্কাৰ ৫ লাখ টকাৰ উন্নয়নমূলক আঁচনি,দ্বিতীয় পুৰষ্কাৰ ৩ লাখ টকাৰ উন্নয়নমূলক আঁচনি আৰু তৃতীয় পুৰষ্কাৰত থাকিব ২ লাখ টকাৰ উন্নয়নমূলক আঁচনি । এই প্ৰতিযোগিতাত প্ৰতিখন গাঁৱৰ আলিবাট,ৰাজহুৱা স্থান,অনুষ্ঠান-প্ৰতিষ্ঠান,বিদ্যালয়,ধৰ্মীয় অনুষ্ঠান আদিৰ স্বচ্ছতাৰ প্ৰতি গুৰুত্ব দিয়া হ'ব । প্লাষ্টিক বৰ্জনৰ বাবে দিয়া হ'ব বিশেষ গুৰুত্ব । তাৰোপৰি ৰাজহুৱা স্থান আৰু ব্যক্তিগত বাৰীত থকা পৰম্পৰাগত বৃক্ষৰ উৎকৃষ্ট প্ৰতিপালনৰ বাবে থাকিব সুকীয়া মূল্যাংকন। ১৪৮ খন গাঁৱৰ অংশগ্ৰহণত আনন্দিত হৈ পৰিছে বিধায়ক গৰাকী । সমগ্ৰ খুমটাই সমষ্টিক স্বচ্ছ ৰূপত গঢ়ি তোলাৰ উদ্দেশ্য আয়োজন কৰা প্ৰতিযোগিতাৰ জৰিয়তে এক স্বচ্ছ সমষ্টি ৰূপে গঢ় দিয়াৰ পৰিকল্পনা কৰিছে বিধায়ক মৃণাল শইকীয়াই।