চৰাইদেউ জিলা প্ৰশাসনৰ উদ্যোগত অহা ১৭ ফেব্ৰুৱাৰী তাৰিখে বিস্তৃত কাৰ্যসূচীৰে চৰাইদেউ জিলা প্ৰতিষ্ঠা দিৱস- ২০২৩ উদযাপন কৰা হ'ব। জিলা প্ৰতিষ্ঠা দিৱস সফলতাৰে সম্পন্ন কৰাৰ বাবে জিলা প্ৰশাসনে পূৰ্ণ প্ৰস্তুতি অব্যাহত ৰাখিছে। জিলা প্ৰতিষ্ঠা দিৱসৰ কাৰ্যসূচী অনুসৰি অহা ১৭ ফেব্ৰুৱাৰী তাৰিখে পুৱা ৬:০০ বজাত উপায়ুক্ত কাৰ্যালয়ৰ পৰা সোণাৰি পুখুৰী হৈ পুনৰ উপায়ুক্ত কাৰ্যালয়লৈ এক চাইকেল ৰেলীৰ আয়োজন কৰা হৈছে। সোণাৰি পৌৰসভাৰ উদ্যোগত স্থানীয় লাচিত উদ্যানত পুৱা ৮:০০ বজাত চাফাই অভিযান আৰু গছপুলি ৰোপণ কৰা হ'ব। লাচিত উদ্যানতে পুৱা ৯:০০ বজাত মহান ব্যক্তিসকলৰ প্ৰতিমূৰ্তিত মাল‍্যাৰ্পণ কৰা হ'ব। চৰাইদেউ জিলা অসামৰিক চিকিৎসালয়ত পুৱা ৯:৩০ বজাত ৰক্তদান শিবিৰৰ আয়োজন কৰা হৈছে। দিনৰ ১০:০০ বজাত চৰাইদেউ জিলা স্বাস্থ্য বিভাগৰ যুটীয়া সঞ্চালকৰ সৌজন্যত চৰাইপুং প্ৰাথমিক বিদ্যালয় আৰু পাটসাঁকো এলেকাত স্বাস্থ্য শিবিৰ অনুষ্ঠিত কৰা হ'ব। সোণাৰি আৰু মৰাণ পৌৰসভাৰ অন্তৰ্গত এলেকাত দিনৰ ১১:০০ বজাত প্ৰধানমন্ত্ৰী আৱাস যোজনা (নগৰাঞ্চল)ৰ অধীনত ৪৯ টা গৃহৰ গৃহ প্ৰৱেশ অনুষ্ঠানৰ আয়োজন কৰা হৈছে। সাপেখাতিত চৰাইদেউ জিলা কৃষি বিভাগৰ উদ্যোগত দিনৰ ১১:৩০ বজাত বিভাগীয় হিতাধিকাৰী সকলৰ মাজত কৃষি সা-সঁজুলি বিতৰণ কৰাৰ লগতে এখনি কৃষক মেলাৰ শুভ উদ্বোধন কৰা হ'ব। আনহাতে, চৰাইদেউ জিলা লোকনিৰ্মাণ (পথ) বিভাগৰ উদ্যোগত দিনৰ ১২:০০ বজাত থুকুবিল সত্ৰ পথ আৰু বনমালি তিনিআলিৰ পৰা বনমালি বাগিচা পথৰ আধাৰশিলা স্থাপন কৰা হ'ব। জিলাখনৰ বিভিন্ন বিভাগৰ মূৰব্বী বিষয়াসকলে দিনৰ ১২:৩০ বজাত বিভাগীয় কাৰ্যালয় প্ৰাঙ্গনত গছপুলি ৰোপণ কৰাৰ লগতে বিভাগীয় সাফল্যৰ আলোকচিত্ৰ প্ৰদৰ্শন কৰিব। ইয়াৰ লগতে, চৰাইদেউ জিলা প্ৰশাসনৰ উদ্যোগত জিলা কাৰাগাৰ, জিলা অসামৰিক চিকিৎসালয় আৰু মথুৰাপুৰস্থিত বৃদ্ধাশ্রমত বিয়লি ১:০০ বজাত আবাসীসকলৰ মাজত ফল-মূল আৰু উপহাৰ বিতৰণ কৰা হ'ব। উল্লেখযোগ্য যে, উপায়ুক্ত কাৰ্যালয় প্ৰাঙ্গনত উপায়ুক্ত পল বৰুৱাই বিয়লি ২:০০ বজাত বিনামূলীয়া আহাৰ গ্ৰহণ কাৰ্যসূচীৰ শুভাৰম্ভ কৰিব। জিলা প্ৰতিষ্ঠা দিৱস উদযাপনৰ লগত সংগতি ৰাখি সোণাৰি ৰাজহুৱা প্ৰেক্ষাগৃহত আবেলি ৪:০০ বজাত এখনি মুকলি সভা আৰু বঁটা বিতৰণী অনুষ্ঠান অনুষ্ঠিত হ'ব। আনহাতে, সন্ধিয়া ৫:০০ বজাত সোণাৰি ৰাজহুৱা প্ৰেক্ষাগৃহতে সাংস্কৃতিক সন্ধ্যাৰ আয়োজন কৰা হৈছে। চৰাইদেউ জিলা প্ৰতিষ্ঠা দিৱসৰ সমুহ কাৰ্যসূচী সফলতাৰে সম্পন্ন কৰাৰ বাবে চৰাইদেউ জিলা প্ৰশাসনে জিলাবাসীৰ পূৰ্ণ সহযোগিতা কামনা কৰিছে।