গাম্ভীৰ্যপূৰ্ণ মাংগলিক কাৰ্যসূচীৰে আজি গোলাঘাট জিলা সাহিত্য সভাৰ বিংশতিতম দ্বি-বাৰ্ষিক অধিৱেশনৰ লাইখুঁটা স্থাপন । গোলাঘাট নগৰৰ ঐতিহ্যমণ্ডিত অজন্তা কলা মণ্ডলৰ বাকৰিত সাহিত্য অনুৰাগীৰ সমাৱেশত লাইখুঁটা স্থাপন কৰে বিশিষ্ট সমাজকৰ্মী,অৱসৰপ্ৰাপ্ত কৃতি শিক্ষক,অসম সাহিত্য সভাৰ আজীৱন সভ্য ৰবীন্দ্ৰ নাথ বৰুৱাই । আদৰণি সমিতিৰ সম্পাদক ৰাজীৱ লস্কৰে আঁত ধৰা লাইখুঁটা স্থাপন কাৰ্যসূচীত গোলাঘাট জিলা সাহিত্য সভাৰ সভাপতি পৱিত্ৰ বৰবৰা, সম্পাদক বন্তি বৰা, আদৰণি সমিতিৰ সভাপতি দ্বীপেন দত্ত, গোলাঘাট জিলা সাহিত্য সভাৰ নৱ-নিৰ্বাচিত সভাপতি গুণেন্দ্ৰ নাথ বৰা, অসম সাহিত্য সভাৰ কেন্দ্ৰীয় বিষয়ববীয়া তথা আদৰণি সমিতিৰ মুখ্য উপদেষ্টা দিগন্ত কুমাৰ ভূঞা,আদৰণি সমিতিৰ কাৰ্যকৰী সভাপতি তনুজ কুমাৰ মহন্ত আদিয়ে শুভেচ্ছামূলক বক্তব্য আগবঢ়ায় । অহা ১১ আৰু ১২ ফেব্ৰুৱাৰীত দুদিনীয়া বিস্তৃত কাৰ্যসূচীৰে পশ্চিম গোলাঘাট শাখা সাহিত্য সভাৰ উদ্যোগত আয়োজিত অধিৱেশনৰ প্ৰস্ততি আদৰণি সমিতিয়ে পূৰ্ণ গতিত অব্যাহত ৰাখিছে । ১২ ফেব্ৰুৱাৰীৰ পুৱা ১০ বজাত অজন্তা কলা মণ্ডলৰ বাকৰিত সমাৱেশ ঘটিব জিলাখনৰ নবীন-প্ৰবীণ লেখক ,কবি,গল্পকাৰ, ঔপন্যাসিক আদিৰ । পশ্চিম গোলাঘাট শাখা সাহিত্য সভা আৰু আদৰণি সমিতিয়ে জিলাখনৰ ১০০ গৰাকী নবীন-প্ৰবীণ লেখক,কব,গল্পকাৰ,ঔপন্যাসিক আদিক বিশেষভাৱে সম্বৰ্ধনা জনাব । ১১ ফেব্ৰৱাৰীৰ সন্ধিয়াভাগত গোলাঘাট সদৰ কবি সন্মিলন আৰু পশ্চিম গোলাঘাট শাখা সাহিত্য সভাৰ উদ্যোগত অনুষ্ঠিত হ'ব শীতৰ দলিছাত গীত,নৃত্য,কবিতাৰ উমাল সন্ধিয়া শীৰ্ষক এক মনোৰম অনুষ্ঠান ।