ৰাষ্ট্ৰীয় পশুধন মিছনৰ উদ্যোগত লখিমপুৰ জিলা পশুপালন বিভাগৰ দ্বাৰা নাৰায়ণপুৰত অনুষ্ঠিত হৈছে তিনিদিনীয়া বৈজ্ঞানিক পদ্ধতিৰ পশুপালন প্ৰশিক্ষণ কৰ্মশালা ৷ আচঁনি খনৰ জৰিয়তে লখিমপুৰ জিলাৰ নাৰায়ণপুৰ , উত্তৰ লখিমপুৰ আৰু ঢকুৱাখানা এই তিনিস্থানত ২৭০ গৰাকী লোকক হাঁহ , ছাগলী আৰু গাহৰি পালন সম্পৰ্কে প্ৰশিক্ষণ প্ৰদান কৰা হ’ব ৷ ইয়াৰে নাৰায়ণপুৰত তিনিটা স্থান ক্ৰমে নাৰায়ণপুৰ প্ৰেছ ক্লাব , জ্যেষ্ঠ নাগৰিক সন্থা আৰু নাৰায়ণপুৰ ক্ৰীড়া সন্থাৰ প্ৰেক্ষাগৃহত মুঠ ৯০ গৰাকী হিতাধিকাৰীক আজিৰে পৰা প্ৰশিক্ষণ প্ৰদান কৰা হয় ৷ প্ৰশিক্ষণ কৰ্মশালাৰ আৰম্ভণি অনুষ্ঠানত লখিমপুৰ জিলা পশুপালন বিষয়া সত্যপতি গয়াৰি , নাৰায়ণপুৰ আৰু লালুক খন্ড পশুপালন বিষয়া ডা° জ্যোতি পৱন চুতীয়া আৰু ডা° কুশল বৰুৱা , সাংবাদিক সৰোজ কুমাৰ নেওগৰ লগতে জ্যেষ্ঠ সহায়ক পুতুল বৰুৱাকে প্ৰমুখ্যে একাংশ চিকিৎসা সহায়ক উপস্থিতি থাকে ৷ প্ৰশিক্ষণৰ প্ৰথম দিনটোত চিকিৎসক সকলৰ দ্বাৰা প্ৰশিক্ষণ প্ৰদান কৰাৰ বিপৰীতে দ্বিতীয় দিনা লখিমপুৰ পশুচিকিৎসা মহাবিদ্যালয় তৰফৰ পৰা প্ৰশিক্ষণ প্ৰদান কৰা হ’ব ৷