সোণোৱালী পথাৰত এতিয়া সোণগুটি বুটলাৰ সময় । হেঁপাহৰ পথাৰত চৌদিশে মাথো পকা ধানৰ আমোলমোল গোন্ধ । গাঁৱে ভূঞে পুৰুষ মহিলাসকল ব্যস্ত লখিমীক ঘৰলৈ আদৰাৰ বাবে । এই দৃশ্য ডিব্ৰুগড়ৰ জিলাৰ টিংখাঙৰ মাহমৰা গাঁৱৰ । হাতত কাচি লৈ সোণগুটি চপোৱাত ব্যস্ত মাহমৰা গাঁৱৰ দাৱনীসকল। হাতৰ মুঠিত আলফুলে বান্ধিছে বছৰযোৰা সপোনবোৰ । মলয়াৰ বা লাগি আনন্দত নাচি উঠা সোণোৱালী লখিমীৰ জিৰজিৰ শব্দ , কাচিৰ খচখচনিয়ে যেন সৃষ্টি কৰিছে এক অনবদ্য সুৰ । আনপিনে দাৱনীৰ সমানে সোণগুটিৰ ডাঙৰী বান্ধি ঘৰলৈ অনাত ব্যস্ত কৃষকসকল । হেঁপাহৰ পথাৰ খনৰ আমোলমোল গোন্ধত যেন ভাগৰ হেৰাইছে কৃষকৰ । ইফালে ব্যস্ততাৰ মাজতো পথাৰতে বহি নিমখ - জলকীয়াৰে ৰবাব টেঙাৰ জুতি লৈছে মাহমৰা গাঁৱৰ দাৱনীসকলে । তাৰ মাজে মাজে কথা আৰু হাঁহিৰ মহলা । কোনোৱে আকৌ বিহু মাৰি প্ৰকাশ কৰিছে মনৰ আনন্দ। এয়াই এতিয়া ৰাজ্যৰ আঘোণা পথাৰৰ ব্যস্ততা ৷