नगर: नगर-पुणे महामार्गावर सोमवारी दुपारी कामरगाव (ता. पारनेर) येथे एसटी बस व कंटेनर यांच्यात अपघात होऊन दोन्हीही वाहनाचे मोठे नुकसान झाले. यात सुदैवाने एसटीमधील प्रवासी आणि चालक- वाहक हे सुखरूप बचावले आहेत.

याबाबत माहिती अशी की, मंडणगड डेपोची बस क्रमांक एमएच 20 बीएल 2779 ही एसटी बस शिर्डीकडून नगर-पुणे महामार्गावरुन जात असतांना सोमवारी दुपारी कामरगाव शिवारात आल्यावर कंटेनर (एमएच 46 सीएम 6559) चालकाचे गाडीवरील नियंत्रण सुटले व तो कंटेनर एसटी बसवर जोरात आदळून पुढे पलटी झाला.

एसटी बस चालकाने प्रसंगावधान राखत गाडी बाजूला घेण्याचा पुरेपुर प्रयत्न केला. त्यामुळे गाडी रोडच्या बाजूला जाऊन तिरपी अर्धवट पल्टी झाली. परंतु एसटी बसमधील कुणालाही काहीही झाले नाही. एसटीमध्ये चालक वाहकासोबत 41 प्रवासी होते. सर्व प्रवासी सुखरूप असून त्यांना इतर बसमध्ये बसवून मार्गस्थ केले.