শ্ৰী শ্ৰী কৃষ্ণৰ ৰাস মহোৎসৱক লৈ ৰাজ্যৰ অন্যান্য প্ৰান্তৰ লগতে বৃহত্তৰ মৰাণ অঞ্চলতো দেখা গৈছে উখল-মাখল পৰিবেশ৷ মৰাণৰ ৰাইদঙীয়াস্থিত স্থায়ী ৰাস মঞ্চত কাইলৈ ৭ নৱেম্বৰৰ পৰা দুদিনীয়াকৈ অনুষ্ঠিত হ’ব বিংশতিতম দ্বি-বাৰ্ষিক ৰাস মহোৎসৱ৷ ৰাইদঙীয়া ৰাস উদ্‌যাপন সমিতিৰ উদ্যোগত আয়োজন কৰা এই ৰাস মহোৎসৱৰ দুয়োটা দিনত দুটা ভিন্ন শিল্পীৰ দলে ৰাস মঞ্চস্থ কৰিব৷ ইফালে মৰাণ অঞ্চলৰ বিভিন্ন প্ৰান্তৰ ডেৰ শতাধিক ন-পুৰণি শিল্পী ৰাস প্ৰদৰ্শনৰ বাবে সাজু হৈছে৷ উল্লেখ্য যে, ১৯৮০ চনৰ পৰা প্ৰতি দুটা বছৰৰ মূৰে মূৰে আয়োজন কৰা এই ৰাস মহোৎসৱ কোৰোনা মহামাৰীৰ বাবে এটা বছৰ বন্ধ হৈ থকাৰ পাচত এইবাৰ নতুন উদ্যমেৰে পুনৰ ৰাস প্ৰদৰ্শনৰ বাবে সাজু হৈছে আয়োজকসকল৷ ৰাস মহোৎসৱখনিত ভাৰত চৰকাৰৰ কেন্দ্ৰীয় মন্ত্ৰী সৰ্বানন্দ সোণোৱাল, অসম চৰকাৰৰ কেবিনেট মন্ত্ৰী ক্ৰমে যোগেন মহন আৰু বিমল বৰা, মৰাণ সমষ্টিৰ বিধায়ক চক্ৰধৰ গগৈকে ধৰি বহুসংখ্যক গণ্য-মান্য ব্যক্তি উপস্থিত থাকিব বুলি জনাইছে উদ্‌যাপন সমিতিৰ সভাপতি হেমন্ত চুতীয়া, যুটীয়া সম্পাদক দেবানন্দ চুতীয়া আৰু যোগ গগৈয়ে৷ দুয়োদিনৰ কাৰ্যসূচীতে বৃহত্তৰ মৰাণ অঞ্চলৰ সকলো শ্ৰেণীৰ ৰাইজৰ উপস্থিতি আৰু সহায় সহযোগিতা কামনা কৰিছে উদ্‌যাপন সমিতিয়ে৷