কালি পূজা বা দিপাৱলীৰ উপলক্ষত চাহ বাগিচা অঞ্চলত পূজা সমিতি সমূহে বোলছবি প্ৰদৰ্শনৰ গইনা লৈ একাংশ দুষ্ট চক্ৰই মদ আৰু জোৱাৰ আড্ডা চলোৱাৰ অভিযোগ উত্থাপন কৰিছে অসম চাহ জনজাতি ছাত্ৰ সন্থাৰ চৰাইদেউ জিলা সমিতিয়ে। এই ক্ষেত্ৰত চৰাইদেউ আৰক্ষী প্ৰশাসনক কঠোৰ পদক্ষেপ গ্ৰহণ কৰাৰ আহ্বান জনাইছে সংগঠনটোৰ চৰাইদেউ জিলা সমিতিৰ সভাপতি মানৱ বাক্তিয়ে। তেখেতে জনোৱা অনুসৰি চাহ বাগিচা অঞ্চলত পূজা অনুষ্ঠিত কৰা পূজা স্থলীত বোলছবি প্ৰদৰ্শন বন্ধ কৰাৰ বাবে জিলা প্ৰশাসনক অনুৰোধ জনোৱা হৈছিল যদিও সেই অনুৰোধ অগ্ৰাহ্য কৰা পৰিপ্ৰেক্ষিতত দুষ্ট চক্ৰই অসামাজিক কাৰ্যকলাপ চলাবলৈ সুবিধা পাইছে। সেয়েহে এই ক্ষেত্ৰত কঠোৰ পদক্ষেপ গ্ৰহণ কৰিবলৈ পুনৰ অনুৰোধ জনাইছে জিলা প্ৰশাসনক।