বাঁহৰ মূঢ়া, কাঠৰ টুকুৰা, গছৰ শিপাকে ধৰি বিভিন্ন পেলনীয়া সামগ্ৰীৰে বিভিন্ন জীৱ-জন্তু, মানুহৰ অৱয়ব প্ৰস্তত কৰি নিজৰ শিল্পী মনৰ পৰিচয় দিবলৈ সক্ষম হৈছে টিংখাঙৰ ঔফুলীয়া গাঁৱৰ এজন লোকে ৷ গাঁওখনৰ মৃদুল হাজৰিকা নামৰ ব্যক্তিজনে ২০০০ চনৰ পৰাই এনেদৰে গাঁৱতে লাভ কৰা বিভিন্ন সামগ্ৰীৰে শিল্পকৰ্ম অব্যাহত ৰাখিছে ৷ পেছাত এজন কাঠমিস্ত্ৰী মৃদুল হাজৰিকাই আজৰি সময়ত নিৰ্জীৱ বাঁহৰ মূঢ়া, কাঠৰ টুকুৰাত নিজৰ শৈল্পিক হাতৰ পৰশত জীৱন্ত ৰূপ দিবলৈ সক্ষম হৈছে ৷ এই দীঘলীয়া সময়ছোৱাত মৃদুল হাজৰিকাই হৰিণা, গড়, হাতী, ভালুক আদিকৰি বিভিন্ন জীৱ-জন্তু আৰু মানুহৰ অৱয়ব প্ৰস্তুত কৰি দৃষ্টি আকৰ্ষণ কৰিবলৈ সক্ষম হৈছে ৷ তদুপৰি বিহুৰ সময়ত লোকবাদ্য গগনা আৰু কাকৈ ফণী নিৰ্মাণ কৰি বিক্ৰী কৰিও আহিছে ব্যক্তিজনে ৷ মৃদুল হাজৰিকাৰ আশা তেওঁৰ শিল্পকৰ্মই এদিন স্বীকৃতি লাভ কৰিবলৈ সক্ষম হ'ব ৷