चिपळूण : वालोपे भोजवाडी येथे मुंबई-गोवा महामार्गाने पती पत्नी मोटर सायकलवरुन जात असताना रस्त्यात पत्नीचा प्रियकर भेटला असता गाडी थांबवून पतीने त्याला शिवीगाळ करून मारहाण केल्याप्रकरणी पतीवर गुन्हा दाखल झाला आहे. ही घटना दि. १५ ऑक्टोबर रोजी सकाळी ९ वा. घडली. या मारहाणीत प्रियकर जखमी झाला आहे. यातील फिर्यादी केतन प्रकाश भोसले (३२ रा. वालोपे भोजवाडी) यांचे १० वर्षांपासून पेढे येथे राहणाऱ्या एका विवाहितेशी प्रेमसंबंध होते. दि. १५ रोजी ती व तिचा पती योगेश हे वालोपेकडे मोटर सायकलवरून जात असताना केतन त्यांना वाटेत दिसला. योगेश यास त्याच्या पत्नीचे व फिर्यादी केतन यांचे प्रेमसंबध माहीत असल्याने योगेश यांने मोटार सायकल तेथेच थांबवून केतन यांना शिवीगाळी केली म्हणून केतन याने योगेश यास त्याबाबत विचारणा केली असता त्याचा राग येऊन त्याने केतन यांना रोडच्या कडेला पडलेली काठी उचलून कपाळावर व उजव्या हाताच्या कोपरावर मारुन दुखापत करून शिविगाळी करून ठार मारण्याची धमकी दिली. यात केतन जखमी झाला आहे. अधिक तपास पोलीस करत आहे.