দীৰ্ঘদিন ধৰি আমগুৰি নগৰৰ লগতে ইয়াৰ দাতিকাষৰীয়া অঞ্চল সমুহত বাইক চুৰৰ দপদপনিত ৰাইজ এক প্ৰকাৰ আতংকিত হৈ পৰিছিল। সদ্যসমাপ্ত শাৰদীয় পূজাত আমগুৰি আৰক্ষীৰ তৎপৰতাত বাইক চুৰি চক্ৰৰে জড়িত পাঁচটাকৈ চুৰ আটক হৈছে।  ২ অক্টোবৰত আমগুৰিৰ মাজমজিয়াত এখন মটৰচাইকেলৰ লক ভাঙি থকা অৱস্থাত নামতি খেম্‌দৈ পুখুৰী অঞ্চলৰ মাইনা খাৰঘৰীয়াক স্থানীয় ৰাইজৰ সহযোগত হাতেলোটে আটক কৰে। মাইনাই আৰক্ষীক দিয়া তথ্যৰ ভিত্তিত আমগুৰি হিলৈদাৰী গাঁৱৰ বিকী হাজৰিকা, আমগুৰি অভয়াপুৰীয়া গাঁৱৰ পঙ্কজ বৰা আৰু হালোৱাটিং আৰক্ষী থানাৰ অন্তৰ্গত আমগুৰি চাহ বাগিচাৰ  জয়দ্বীপ কোঁৱৰ ওৰফে মাইনা আৰু আনন্দ বাউৰীক আৰক্ষীয়ে আটক কৰে। ধৃত বাইক চুৰি চক্ৰটোৰ জিম্মাৰপৰা AS04 X 4836, AS04 W 5754, AS04 AB 8758  নম্বৰৰ তিনিখন মটৰচাইকেল উদ্ধাৰ কৰে। আটকাধীন চুৰ কেইটাক আমগুৰি আৰক্ষীয়ে পৰ্যায়ক্ৰমে আদালতত হাজিৰ কৰি জেল হাজোতলৈ প্ৰেৰন কৰিছে। শেষতীয়াকৈ পঙ্কজ বৰা আৰু আনন্দ বাউৰীক আৰক্ষীয়ে আদালতত হাজিৰ কৰে।