চুবুৰীয়া দেশ বাংলাদেশৰ ৰাজধানী ঢাকাত দুৰ্গাপূজা মণ্ডপত পূজা কৰিছে অসমৰ এজন পুৰোহিতে৷ গাত গামোচা লৈ দুৰ্গাদেৱীৰ পূজা মণ্ডপত বহিছে তেজপুৰৰ পুৰোহিত সুভাষ চন্দ্ৰ চক্ৰৱৰ্তীয়ে৷ তেজপুৰ নিৱাসী প্ৰসিদ্ধ পুৰোহিত সুভাষ চন্দ্ৰ চক্ৰৱৰ্তী ঢাকাৰ আজিমপুৰৰ চৰকাৰী কৰ্মচাৰী আৱাসৰ অস্থায়ী দুৰ্গা পূজা মণ্ডপত পৌৰহিত্য কৰিবলৈ আমন্ত্ৰিত হৈছিল৷ আজিমপুৰ সাৰ্বজনীন শাৰদীয় দুৰ্গোৎসৱ উদ্‌যাপন পৰিষদে তেওঁক পুৰোহিতৰূপে আমন্ত্ৰণ জনাইছিল৷ পুৰোহিত সুভাষ চন্দ্ৰ চক্ৰৱৰ্তীয়ে ‘আমাৰ অসম’ক জানিবলৈ দিয়া মতে তেওঁ ১৫ বছৰ ধৰি দিল্লীত দুৰ্গাপূজাত পৌৰহিত্য কৰি আহিছে৷ এইবেলি প্ৰথমবাৰৰ বাবে তেওঁ দেশৰ বাহিৰৰ দুৰ্গাপূজাৰ পুৰোহিতৰূপে আমন্ত্ৰিত হৈছে৷ তেওঁ কয়–এইবেলি বিদেশৰ মাটিত মোৰ প্ৰথম দুৰ্গাপূজা৷ এয়া পৃথক অভিজ্ঞতা৷ ভিন্ন পৰিৱেশ কিন্তু অভিন্ন কৰ্ম৷ ইয়াৰ মানুহে যি প্ৰত্যাশা লৈ আমাক পুৰোহিতৰূপে আমন্ত্ৰণ জনাইছে সেই প্ৰত্যাশা যাতে পূৰণ কৰিব পাৰো– সেয়া হয়তো মোৰ বাবে প্ৰত্যাহ্বান৷ প্ৰাপ্ত বাতৰি মতে আজিমপুৰ সাৰ্বজনীন দুৰ্গোৎসৱ উদ্‌যাপন পৰিষদৰ প্ৰতিষ্ঠাপক সভাপতি ড॰ শ্যামা প্ৰসাদ বেপাৰীয়ে দিল্লীত সুভাষ চন্দ্ৰ চক্ৰৱৰ্তীৰ বিধিপাঠ, পূজালৈ মুগ্ধ হৈ ঢাকাত অনুষ্ঠিত পূজাত পুৰোহিতৰূপে আমন্ত্ৰণ জনাইছে৷ চক্ৰৱৰ্তীয়ে জানিবলৈ দিয়া মতে বাংলাদেশত পূজাৰ বিধি সামান্য বেলেগ৷ বাংলাদেশত সাত্তিক পূজাই বেছিকৈ হয়৷ অসমত নমামী ব্ৰহ্মপুত্ৰ, নমামী বৰাক অনুষ্ঠিত কৰিবলৈ বহিঃৰাজ্যৰ পৰা পুৰোহিত আমন্ত্ৰণ জনোৱাৰ বিপৰীতে বাংলাদেশৰ ৰাজধানী ঢাকাত পূজা কৰিবলৈ অসমৰ পুৰোহিতে আমন্ত্ৰণ লাভ কৰা প্ৰসংগই ব্যাপক চৰ্চা লাভ কৰিছে৷