वढू बुद्रुक मध्ये पुष्पा स्टाईलने चंदनचोरी
कंपनीच्या कंपाउंडच्या आतमध्ये घुसून चंदनाची चोरी
( तळेगाव ढमढेरे प्रतिनिधी ) वढू बुद्रुक ता. शिरुर येथील एका कंपनीच्या कंपाउंडच्या आतमध्ये घुसून अज्ञात चोरट्यांनी पुष्पराज फिल्मच्या स्टाईलने चोरी करत चंदनाची दोन झाडे चोरून नेत नंतर देखील काही झाडे चोरण्याचा प्रयत्न केला असल्याने शिक्रापूर पोलीस स्टेशन येथे अज्ञात चोरट्यांवर गुन्हा दाखल करण्यात आला आहे.
वढू बुद्रुक ता. शिरुर येथील युनी क्लींगर कंपनीच्या आतमध्ये काही वर्षांपासून चंदनाची काही झाले आहेत, २३ सप्टेंबर रोजी पहाटे दीड वाजण्याच्या सुमारस अज्ञात चोरटे कंपनीच्या कंपाउंडचे पत्रे कापून कंपनीच्या आतमध्ये आले त्यांनी दोन चंदनाची झाडे तोडून चंदन चोरून नेले, दरम्यान कंपनीच्या सुरक्षा रक्षकांच्या निदर्शनास सदर बाब आल्याने त्यांनी याबाबत कंपनी व्यवस्थापकांना माहिती दिली, त्यांनतर पुन्हा दुसऱ्या दिवशी पहाटेच्या सुमारास काही चोरटे पुन्हा सिनेस्टाईल ने कंपनीच्या आतमध्ये चंदनाची झाडे तोडण्यासाठी आले, मात्र यावेळी चोर आल्याचे सुरक्षा रक्षकांच्या लक्षात आल्याने त्यांनी कंपनीतील सायरन वाजवले असता चोरटे शेजारील शेतात पळून जाण्यात यशस्वी झाले, याबाबत महेश सुधाकर अवचट वय ५४ वर्षे रा. नवशा मारुती मंदिर जवळ सिंहगड पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात चोरट्यांवर गुन्हे दाखल केले असून पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक महेंद्र पाटील हे करत आहे.
