বাক্সা: বাক্সা জিলাৰ ভাৰত-ভূটান সীমান্তত অৱস্থিত ৰাজ্যখনৰ অন্যতম মনোৰম পৰ্যটনস্থলী দাৰাগাৱত আজি দাৰাগাৱ-দিৰিং পিকনিক স্পট কো-অপাৰেটিভ ছছাইটিৰ উদ্যোগত আৰু সশস্ত্ৰ সীমা বল চমুকৈ এছএছবিৰ ৬৪ নং বেটেলিয়নৰ সহযোগত আজাদী কা অমৃত মহোৎসৱ কাৰ্যসূচী পালন কৰা হয় । কাৰ্যসূচীত অনুসৰি পুৱা দাৰাগাৱ-দিৰিং পিকনিক স্পটৰ প্ৰৱেশ পথৰ পৰা স্থানীয় ৰাইজে মূল পিকনিক স্পটলৈ এক সজাগতা সমদল বাহিৰ কৰে । ইয়াৰ পিচত দাৰাগাৱ-দিৰিং পিকনিক স্পটৰ কাৰ্যালয়ৰ শিলান্যাস কৰে এছএছবিৰ ৬৪ নং বেটেলিয়নৰ কামাণ্ডেন্ট নন্দ কিশোৰ টামটাই ৷ শিলান্যাস কৰি তেওঁ আজাদী কা অমৃত মহোৎসৱ উপলক্ষে পৰ্যটনস্থলীত গছপুলি ৰোপণ কৰাৰ লগতে "হৰ ঘৰ ত্ৰিৰংগা" শীৰ্ষক কাৰ্যসূচীৰে ৰাইজৰ মাজত সজাগতা সৃষ্টিৰ প্ৰয়াস কৰা বুলি কয় ৷ দাৰাগাৱ-দিৰিং পিকনিক স্পট সুন্দৰ আৰু পৰিস্কাৰ ৰখাৰ বাবে এছএছবিৰ ফালৰ পৰা ১০ টা ডাষ্টবিনো কামাণ্ডেন্ট গৰাকীয়ে কৰ্তৃপক্ষক প্ৰদান কৰে । আনহাতে অনুষ্ঠানত উপস্থিত থাকি দাৰাগাৱ-দিৰিং পিকনিক স্পট কো-অপাৰেটিভ চ'ছাইটিৰ সভাপতি জগদীশ ৰামচিয়াৰীয়ে পৰ্যটক সকলক প্লাষ্টিক জাতীয় সামগ্ৰী য'তে-ত'তে নেপেলাই এক সঠিক স্থানত মজুত কৰি ৰাখিবলৈ আহ্বান জনায় ৷ আজিৰ এই অনুষ্ঠানত দাৰাগাৱ সমবায় প্ৰভাৰী ৱাই কুমাৰ সিঙ, অবিচি বোৰ্ডৰ বাক্সা জিলা সমিতিৰ সভাপতি থমণ কৈৰালাৰ উপৰিও এছএছবিৰ ভালেসংখ্যক জোৱান আৰু স্থানীয় ৰাইজ উপস্থিত থাকে ৷