ৰঙিয়া আঞ্চলিক ছাত্র সন্থাৰ অন্তৰ্গত শাখা উত্তৰ ৰঙিয়া ছাত্র সন্থাই আজি ৰঙিয়া বুনিয়াদী অভ্যাসন বিদ্যালয়ৰ ২২০ গৰাকী ছাত্র-ছাত্ৰীৰ মাজত স্কুল বেগ বিতৰণ কৰে । উক্ত বেগ বিতৰণ কাৰ্যসূচী উদ্বোধন কৰে বিদ্যালয়খনৰ প্ৰধান শিক্ষক সৰ্বেশ্বৰ লহকৰে । অনুষ্ঠানটো পৰিচালনা কৰা জিলা ছাত্র সন্থাৰ সাংস্কৃতিক সম্পাদক তৌফিকুৰ ৰহমান কয় যে এই বিদ্যালয়ত ২২০ জন ছাত্ৰ-ছাত্ৰীৰ বিপৰীতে মাত্র ৬ গৰাকী শিক্ষকে পাঠদান কৰিবলগীয়া হৈছে । যাৰ বাবে কন কন ছাত্র-ছাত্ৰী সকলে উপযুক্ত শিক্ষাৰ পৰা বঞ্চিত হব লগা হৈছে । ইয়াৰ উপৰিও শ্ৰেণীকোঠা , ডেস্ক -বেঞ্চৰ অভাৱ আছে । বিদ্যালয়খনত পৰ্যাপ্ত শিক্ষক নিযুক্ত কৰাৰ লগতে অভাৱ সমূহ দূৰ কৰিবলৈ ছাত্ৰ নেতা ৰহমানে দাবী জনায় । অনুষ্ঠানটোত উপস্থিত থকা কটন কলেজিয়েটৰ অৱসৰপ্ৰাপ্ত অধ্যক্ষ ডঃ দিবাকৰ শৰ্মাই আছুৰ এই পদক্ষেপক ভূয়সী প্ৰশংসা কৰে । বিশেষকৈ এই বিদ্যালয়খনৰ অধিকাংশ‌ই শিক্ষাৰ্থীয়ে বান বিধ্বস্ত অঞ্চলৰ অতি দৰিদ্ৰ পৰিয়ালৰ সন্তান । আছুৱে বেগ বিতৰণ কৰাত এইসকল ছাত্র-ছাত্ৰীয়ে কিছু পৰিমাণে হ'লেও সকাহ লাভ কৰিব বুলি শৰ্মাই দোহাৰে । উক্ত কাৰ্য্যসূচীত উপস্থিত থাকে সাংবাদিক ফাৰুক হুছেইন , জিলা ছাত্ৰ সন্থাৰ কাৰ্য্যনিৰ্বাহ বুবুল আলী , ৰঙিয়া আঞ্চলিক ছাত্র সন্থাৰ সাধাৰণ সম্পাদক মৃন্ময় কুমাৰ ডেকা ।