મુખ્યમંત્રી અરવિંદ કેજરીવાલે બુધવારે કોમનવેલ્થ ગેમ્સ 2022ના સુવર્ણ ચંદ્રક વિજેતા અમિત પંઘાલ અને કાંસ્ય ચંદ્રક વિજેતા પૂજા ગેહલોતને મળ્યા અને આંતરરાષ્ટ્રીય મંચ પર ભારતને ગૌરવ અપાવવા બદલ અભિનંદન આપ્યા.

આ દરમિયાન તેમની વચ્ચે દિલ્હી અને સમગ્ર દેશમાં રમતગમત માટે અનુકૂળ વાતાવરણને પ્રોત્સાહન આપવા પર ચર્ચા થઈ હતી. સીએમ કેજરીવાલે કહ્યું કે દિલ્હી સ્પોર્ટ્સ યુનિવર્સિટી માત્ર દિલ્હીની જ નહીં પરંતુ સમગ્ર દેશની છે. દિલ્હી સ્પોર્ટ્સ યુનિવર્સીટી બંને એથ્લેટ્સનો ટેકો લેશે જેથી નવોદિતો પણ તેમના અનુભવોનો લાભ લઈ શકે.

સીએમ કેજરીવાલે કહ્યું કે અમે વિશ્વ કક્ષાની સ્પોર્ટ્સ ઇન્સ્ટિટ્યૂટ વિકસાવવા માટે દેશભરના એથ્લેટ્સ અને નિષ્ણાતોના અનુભવોને સામેલ કરીશું. આ અવસરે સીએમ અરવિંદ કેજરીવાલે પૂજા ગેહલોતને તેમની વિનંતી પર કોમનવેલ્થ ગેમ્સમાં જીતેલ બ્રોન્ઝ મેડલ પહેરાવીને સન્માનિત કર્યા હતા.

અમિત પંઘાલે CWG 2022માં બોક્સિંગમાં ગોલ્ડ મેડલ જીત્યો છે. આ સાથે જ પૂજાએ કુસ્તીમાં બ્રોન્ઝ મેડલ જીત્યો છે. પૂજા રાષ્ટ્રીય સ્તરે દિલ્હીનું પ્રતિનિધિત્વ કરે છે અને રાજ્યમાં રમતગમતની સુવિધાઓમાં તાલીમ લઈ રહી છે.