ৰঙিয়াৰ পূৱ তুলসীবাৰীত বৰলীয়া নৈৰ প্ৰবল খহনীয়া । এই ভয়াবহ খহনীয়াৰ বাবে জাহ যোৱাৰ উপক্ৰম হৈছে শতাধিক পৰিয়ালৰ ভেটি-মাটি । ইতিপূৰ্বে এই খহনীয়াত অঞ্চলটোৰ ৭৫ টা পৰিয়ালৰ ঘৰ-দুৱাৰ নদীত জাহ গৈছে । ইয়াৰ উপৰিও কেইবা হাজাৰ বিঘা কৃষি ভুমি নৈ খনত বিলীন হৈ গৈছে । প্ৰায় ডেৰ মাহ পূৰ্বে হোৱা প্ৰলয়ংকাৰী বানৰ পিছত নৈখন প্ৰায় ২৫০ ফুট পৰ্যন্ত গাওঁখনৰ দিশে আগুৱাই গতি কৰাত অঞ্চলটোৰ বাবে ভাবুকি কঢ়িয়াই আনিছে । নৈখনে গতিপথ সলনি কৰাৰ বাবে গাঁওখনৰ একমাত্ৰ শিক্ষানুষ্ঠানটোৰ মছজিদ এটা জাহ যাবলৈ মাত্ৰ ১০ ফুট বাকী আছে । অঞ্চলটোৰ ৰাইজে জলসম্পদ বিভাগক খহনীয়া প্ৰতিৰোধ কৰাৰ বাবে আবেদন জনাইছে । কিন্তু জলসম্পদ বিভাগে কোনোধৰণৰ গুৰুত্ব দিয়া নাই । এইলৈ ভুক্তভোগী গাঁওবাসীয়ে ক্ষোভ প্ৰকাশ কৰে । ক্ষুব্ধ গঞাই শীঘ্ৰে গৰাখহনীয়া ৰোধৰ বিজ্ঞানসন্মত ব্যৱস্থা গ্ৰহণ কৰি এনে জ্বলন্ত সমস্যাৰ সমাধান কৰিবলৈ দাবী জনাইছে ।