সোণাৰি বিধানসভা সমষ্টিৰ অন্তৰ্গত বৰহাট প্ৰাথমিক স্বাস্থ্য কেন্দ্ৰত চিকিৎসকৰ অভাৱৰ বাবেই এতিয়া বিপাঙত পৰিছে জনসাধাৰণ। বৃহত্তৰ বৰহাট অঞ্চলৰ ৫২ খন ৰাজহ গাঁৱৰ হাজাৰ হাজাৰ লোকৰ প্ৰাথমিক চিকিৎসাৰ একমাত্ৰ ভৰসাৰস্থল বৰহাট প্ৰাথমিক স্বাস্থ্য কেন্দ্ৰটো। কিন্তু অতি দুৰ্ভাগ্যজনকভাৱে এই প্ৰাথমিক স্বাস্থ্য কেন্দ্ৰত মাত্ৰ এগৰাকী অস্থায়ী চিকিৎসক থকাৰ বাবে অসুবিধাৰ সন্মুখীন হৈ আহিছে জনসাধাৰণে। আনহাতে কোনো কোনো সময়ত চিকিৎসাৰ বাবে অহা লোকসকলে চিকিৎসকৰ অভাৱৰ বাবে বিনা চিকিৎসাৰেই উভতি যাবলগীয়া হয় ঘৰলৈ। ইয়াৰ পৰিপ্ৰেক্ষিতত চিকিৎসালয়খনৰ পৰিচালনা সমিতিৰ সদস্য তথা স্থানীয় ৰাইজে অতিশীঘ্ৰেই স্থায়ী চিকিৎসক নিযুক্তিৰ দাবী উত্থাপন কৰিছে।