ડીસા તાલુકાના ઢુવા રોડ પર ગત વર્ષે બનેલી ભયાનક ફટાકડા ફેક્ટરી બ્લાસ્ટ હોનારતમાં 22 શ્રમિકોના મોત બાદ હવે વધુ એક ગંભીર બેદરકારી સામે આવી છે. તપાસમાં ખૂલ્યું છે કે, ફેક્ટરી સંચાલકે કાયદા મુજબ ફરજીયાત જાહેર જવાબદારી વીમો (Public Liability Insurance) લીધો જ ન હતો. કલેક્ટરના આદેશના આધારે મામલતદારે ફેક્ટરી માલિક સામે ગુનો નોંધાવતાં સમગ્ર મામલે ફરી ચર્ચા શરૂ થઇ છે. 

ડીસા તાલુકાના ઢુવા રોડ પર આવેલી ગેરકાયદે ફટાકડા ફેક્ટરીમાં થયેલા ભયાનક વિસ્ફોટ કેસમાં હવે વીમા નિયમોના ભંગનો મુદ્દો પણ ઉમેરાતાં કેસ વધુ ગંભીર બન્યો છે. ગત તા. 1 એપ્રિલ 2025 ના રોજ સર્વે નં. 384 માં આવેલી 'દિપક ટ્રેડર્સ' નામની ફટાકડા ફેક્ટરીમાં અચાનક થયેલા વિસ્ફોટમાં કુલ 22 શ્રમિકોના મોત થયા હતા. જ્યારે પાંચ લોકો ગંભીર રીતે ઘાયલ થયા હતા. મૃતકોમાં મધ્યપ્રદેશના હરદા અને દેવાસ વિસ્તારના તેમજ સ્થાનિક શ્રમિકોનો સમાવેશ થતો હતો.

આ ઘટનાના અનુસંધાનમાં ડીસા તાલુકા પોલીસે ફેક્ટરી માલિક સંકળાયેલા વ્યક્તિ સામે ગુનો નોંધી ચાર્જશીટ કોર્ટમાં રજૂ કરી હતી. જોકે, ઘટનાની ગંભીરતા ધ્યાનમાં લઇ બનાસકાંઠા જીલ્લા મેજીસ્ટ્રેટ અને કલેક્ટરે અલગથી સુઓ મોટો કાર્યવાહી હાથ ધરી હતી. ખૂબચંદ મોહનાણી, દીપક મોહનાણી અને અન્ય એક મૃતકોના વારસદારો અને ઇજાગ્રસ્તો તરફથી વળતર માટે કુલ 28 અરજીઓ મળતાં ક્લેક્ટર કચેરીમાં કાયદાકીય પ્રક્રિયા શરૂ કરવામાં આવી હતી.

તપાસ દરમિયાન જાણવા મળ્યું હતું કે, ફેક્ટરીમાં જોખમી પ્રવૃત્તિ થતી હોવા છતાં જાહેર જવાબદારી વીમા અધિનિયમ-1991 હેઠળ ફરજીયાત વીમો લેવાયો ન હતો. આ વીમાનો હેતુ દુર્ઘટના સમયે શ્રમિકો અને અસરગ્રસ્ત લોકોને વળતર મળવાની કાયદાકીય સુરક્ષા આપવાનો હોય છે.

તપાસના આધારે જીલ્લા મેજીસ્ટ્રેટે ગત તા. 4 મેના રોજ જવાબદાર સામે કાર્યવાહી કરવા આદેશ આપ્યો હતો. ત્યારબાદ ડીસા ગ્રામ્યના મામલતદાર વિપુલકુમાર કે. બારોટે સરકાર તરફે જાહેર જવાબદારી વીમા અધિનિયમની કલમ-4 અને 14 મુજબ દીપકકુમાર ખૂબચંદ મોહનાણી સામે સત્તાવાર ફરિયાદ નોંધાવી છે.