ડીસામાં ત્રણ પેઢીઓમાંથી ઘીના નમૂના લેવાયા, રૂપિયા 8.28 લાખનો જથ્થો જપ્ત..

બનાસકાંઠા ખોરાક અને ઔષધ નિયમન તંત્ર દ્વારા ડીસા માં 3 ડેરી પ્રોડક્ટ્સ પેઢીઓ પર કાર્યવાહી કરવામાં આવી છે, આ પેઢીઓ પરવાનગી વિના કાર્યરત હતી, તંત્રએ 'પરિવાર', 'કવિરાજ' અને 'શ્રેષ્ઠ' બ્રાન્ડના ઘીના નમૂના લીધા હતા અને કુલ 1444 કિલોગ્રામ ઘીનો આશરે રૂપિયા 8,28,490/- કિંમતનો જથ્થો જપ્ત કર્યો હતો..

પાલનપુર વર્તુળ કચેરીના ખોરાક અને ઔષધ નિયમન તંત્ર દ્વારા ડીસા ખાતે શંકાસ્પદ ઘી ની તપાસ માટે વિશેષ ઝુંબેશ હાથ ધરવામાં આવી હતી. સિનિયર ફૂડ સેફટી ઓફિસર એચ.વી. ગુર્જર, ફૂડ સેફટી ઓફિસર એમ.એલ. ગુર્જર અને કુ. ઇ.એસ. પટેલ ની ટીમે ડીસા વિસ્તાર માં ઘીનું ઉત્પાદન અને વેચાણ કરતી 3 જુદી જુદી પેઢીઓની તપાસ કરી હતી..

આ તપાસ દરમિયાન, શંકાસ્પદ જણાયેલા ઘી ના કુલ 4 નમૂના ફૂડ સેફટી એન્ડ સ્ટાન્ડર્ડ એક્ટ-2006 હેઠળ લેવામાં આવ્યા હતા..

તંત્રએ કુલ 1444 કિલો ગ્રામ ઘી નો, જેની અંદાજિત કિંમત રૂપિયા 8,28,490/- છે, તે જથ્થો જપ્ત કર્યો હતો, તપાસમાં એ પણ સામે આવ્યું કે આ પેઢીઓ માન્ય પરવાનગી વિના ધંધો કરી રહી હતી..

ફૂડ સેફટી ઓફિસર એમ.એલ. ગુર્જરે ડીસા માં પંચાલ શેરી સ્થિત મે. તાસ્વી માર્કેટિંગ એન્ડ ડેરી પ્રોડક્ટ્સ, જે લાલચંદ અમૃતભાઈ પંચીવાલા દ્વારા સંચાલિત છે, ત્યાં તપાસ કરી હતી. અહીંથી "પરિવાર કાઉ ઘી" ના 500 મિલી પેકનો નમૂનો લેવામાં આવ્યો હતો અને 448 કિલોગ્રામ ઘી નો, જેની કિંમત રૂપિયા 2,68,800/- હતી, તે જથ્થો જપ્ત કરવામાં આવ્યો હતો..

આ ઉપરાંત, નિકુંજભાઈ ધર્મેશભાઈ મોદી સંચાલિત બહુચર ડેરી પ્રોડક્ટ, પ્લોટ નંબર 30, બનાસ ઇન્ડસ્ટ્રીયલ એરિયા, ડીસા ખાતે પણ તપાસ હાથ ધરવામાં આવી હતી, અહીંથી "કવિરાજ કાઉ ઘી" ના 15 કિલોગ્રામ પેક ટીન નો નમૂનો લેવાયો હતો અને 449 કિલોગ્રામ ઘીનો, જેની કિંમત રૂપિયા 2,51,440/- હતી, તે જથ્થો સીઝ કરવામાં આવ્યો હતો..

ફૂડ સેફટી ઓફિસર એમ.એલ. ગુર્જર અને કુ. ઇ.એસ. પટેલ દ્વારા રાહુલકુમાર દિનેશકુમાર પાવાલા સંચાલિત મે. જયવીર માર્કેટિંગ એન્ડ ડેરી પ્રોડક્ટ્સ, ડીસા ખાતે પણ તપાસ કરવામાં આવી હતી, આ તપાસમાં "શ્રેષ્ઠ કાઉ ઘી" ના 500 મિલી પેક અને લુઝ ઘીના નમૂના લેવામાં આવ્યા હતા, અહીંથી 547 કિલોગ્રામ ઘીનો, જેની કિંમત રૂપિયા 3,08,250/- હતી, તે જથ્થો જપ્ત કરાયો હતો.

આ સમગ્ર મામલે જવાબદારો સામે ફૂડ સેફટી એન્ડ સ્ટાન્ડર્ડ એક્ટ-2006 હેઠળ કાયદેસર ની કાર્યવાહી કરવાની પ્રક્રિયા હાથ ધરવામાં આવી છે..