ડીસા દૂધ મંડળીમાં 60.20 લાખની ઉચાપત, માજી મંત્રી સામે વિશ્વાસઘાત અને છેતરપિંડી ની ફરિયાદ

બનાસકાંઠા જિલ્લાના ડીસા તાલુકાની 'ધી ગેનાજી ગોળીયા દૂધ ઉત્પાદક સહકારી મંડળી' માં લાખો રૂપિયાની નાણાંકીય ગેરરીતિનો મામલો સામે આવ્યો છે, મંડળીના તત્કાલીન મંત્રીએ પોતાના હોદ્દાનો દુરુપયોગ કરીને પશુપાલકોના 60,20,140 રૂપિયાની ઉચાપત કરી વિશ્વાસઘાત કર્યો હોવાની ફરિયાદ નોંધાઈ છે..

મંડળીના વર્તમાન ચેરમેન શંકરજી દલાજી માળીએ નોંધાવેલી ફરિયાદ મુજબ, વર્ષ 2023 થી 2025 દરમિયાન બનાસ ડેરી ના અધિકૃત અધિકારીઓ દ્વારા કરાયેલા ઓડિટમાં કુલ 62,71,103.65 રૂપિયાની નાણાંકીય ગેરરીતિ બહાર આવી હતી..

તપાસ દરમિયાન જાણવા મળ્યું કે 21 ઓક્ટોબર 2018 થી 7 એપ્રિલ 2025 સુધી મંત્રી તરીકે કાર્યરત મોતીજી જોધાજી માળી (ગેલોત) એ રેકર્ડમાં છેડછાડ કરીને આ ઉચાપત આચરી હતી..

ગેરરીતિ પકડાતા મંડળીની કમિટી દ્વારા આરોપી મંત્રીને રકમ જમા કરાવવા માટે મુદ્દત આપવામાં આવી હતી, જોકે, મોતીજી એ માત્ર 2.50 લાખ રૂપિયા જ જમા કરાવ્યા હતા, જ્યારે બાકીના 60,20,140 રૂપિયા લાંબા સમય સુધી પરત કર્યા નહોતા..

પશુપાલકો ને તેમના દૂધના નાણાં સમયસર ન મળતા અને તપાસમાં સત્ય બહાર આવતા આખરે કાયદેસર ની કાર્યવાહી હાથ ધરવામાં આવી છે..

આ મામલે જિલ્લા રજિસ્ટ્રાર સહકારી મંડળી, બનાસકાંઠા ના આદેશ બાદ, ચેરમેન દ્વારા ડીસા રૂરલ પોલીસ મથકે ફરિયાદ નોંધાવવામાં આવી છે, આરોપીએ મંડળીના કિંમતી રેકર્ડ જેવા કે રોજમેળ, બેંક ચેકબુક અને વાઉચર બુકનો દુરુપયોગ કરીને પશુપાલકો અને વહીવટી કમિટી સાથે વિશ્વાસઘાત કર્યો છે, હાલ ડીસા રૂરલ પોલીસે આ મામલે વધુ તપાસ હાથ ધરી છે..