#শিৱসাগৰ কেন্দ্ৰীয় বিদ্যালয়ত NEET ৰ প্ৰস্তুতিমূলক ব্যৱস্থাপনা পৰিদৰ্শন জিলা আয়ুক্তৰ ৷ সমাগত ৩ মে'ত জিলাখনৰ তিনিটা কেন্দ্ৰত অনুষ্ঠিত হ'বলগীয়া ৰাষ্ট্ৰীয় যোগ্যতা তথা প্ৰৱেশ পৰীক্ষা (National Eligibility cum Entrance Test- NEET)-ৰ পৰিপ্ৰেক্ষিতত শিৱসাগৰ জিলাৰ জিলা আয়ুক্ত মৃদুল য়াদৱে অলপতে উক্ত পৰীক্ষাৰ বাবে নিৰ্বাচিত অন্যতম কেন্দ্ৰ শিৱসাগৰৰ অ'এন জি চি কলনিস্থিত কেন্দ্ৰীয় বিদ্যালয়ত উপস্থিত হৈ ৰাষ্ট্ৰীয় পৰ্যায়ৰ এই গুৰুত্বপূৰ্ণ পৰীক্ষা অনুষ্ঠিত কৰাৰ বাবে কেন্দ্ৰটিত গ্ৰহণ কৰা প্ৰস্তুতিমূলক ব্যৱস্থাপনা সম্পৰ্কে বিস্তৃতভাবে বুজ লয়। পৰিদৰ্শন কালত জিলা আয়ুক্তগৰাকীয়ে উক্ত পৰীক্ষাৰ বাবে নিয়োজিত চিটি ক'অৰ্ডিনেটৰৰ লগতে বিদ্যালয় কৰ্তৃপক্ষৰ সৈতে মত-বিনিময়ো কৰে। উল্লেখ্য যে, কেন্দ্ৰীয় বিদ্যালয়, শিৱসাগৰৰ উপৰি জিলাখনৰ শিৱসাগৰ ছোৱালী মহাবিদ্যালয় আৰু কেন্দ্ৰীয় বিদ্যালয়, নাজিৰাত উক্ত পৰীক্ষা অনুষ্ঠিত কৰা হ'ব। জিলা আয়ুক্তগৰাকীৰ পৰিদৰ্শন কালত তেখেতৰ সৈতে নাজিৰাৰ সম-জিলা আয়ুক্ত প্ৰতিভা মেশ্ৰাম, অতিৰিক্ত জিলা আয়ুক্ত মীনাক্ষী পেৰ্মে আৰু সহকাৰী আয়ুক্ত গণেশ চন্দ্ৰ বড়ো উপস্থিত থাকে।
