પાવીજેતપુરના નાની રાસલી ગામે દીપડાનો આતંક: પિતાએ જબડામાંથી ૪ વર્ષની વ્હાલસોયીને મોતના મુખમાંથી ઉગારી
પાવીજેતપુર, તા. ૨૩
પાવીજેતપુર તાલુકાના નાની રાસલી ગામે મોડી રાત્રે દીપડાએ એક ચાર વર્ષની માસૂમ બાળકી પર જીવલેણ હુમલો કરતા સમગ્ર પંથકમાં ભારે ફફડાટ વ્યાપી ગયો છે. પિતાની સમયસૂચકતા અને સાહસને કારણે બાળકીનો જીવ બચ્યો છે, પરંતુ ગળાના ભાગે ગંભીર ઈજાઓ પહોંચતા તેને સારવાર અર્થે બોડેલીના એક ખાનગી દવાખાનામાં ખસેડવામાં આવી છે.
પ્રાપ્ત વિગતો અનુસાર, નાની રાસલી ગામના રહેવાસી સુરેશભાઈ રાઠવાની ચાર વર્ષની પુત્રી ધ્રૂવીષાબેન ઘરના પાછળના ભાગે રમી રહી હતી. આ સમયે અંધારાનો લાભ લઈ ત્રાટકેલા દીપડાએ એકાએક હુમલો કરી બાળકીને ગળાના ભાગેથી દબોચી લીધી હતી. તે સમયે સુરેશભાઈ સ્નાન કરી રહ્યા હતા, પરંતુ દીકરીની ચીસ સાંભળતા જ તેઓ તાત્કાલિક બહાર દોડી આવ્યા હતા.
પોતાની નજર સામે કાળ સમાન દીપડાને જોઈ ડર્યા વગર સુરેશભાઈએ હિંમત બતાવી હતી. તેમણે દીપડાના જબડામાં ફસાયેલી માસૂમ બાળકીને છોડાવવા માટે ભારે સંઘર્ષ કર્યો હતો. પિતાના પ્રતિકાર અને બૂમાબૂમ થતા અંતે દીપડો બાળકીને લોહીલુહાણ હાલતમાં છોડીને ભાગી છૂટ્યો હતો. જોકે, થોડીવાર બાદ તે ફરી ઘટનાસ્થળે લટાર મારતો દેખાતા લોકોમાં ફાળ પડી હતી.
હુમલામાં ગંભીર રીતે ઘાયલ થયેલી ધ્રૂવીષાને તાત્કાલિક પાવીજેતપુર સામુહિક આરોગ્ય કેન્દ્ર ખાતે લઈ જવામાં આવી હતી, જ્યાંથી વધુ સારવાર માટે તેને બોડેલીની ખાનગી હોસ્પિટલમાં ખસેડવામાં આવી છે.
આ બનાવની જાણ થતા જ વન વિભાગના અધિકારી જે. કે. સોલંકી એક્ટિવ થઈ ગયા હતા. અને વન વિભાગની ટીમ ઘટનાસ્થળે રાત્રે જ દોડી આવ્યા હતી. વન વિભાગ દ્વારા તાત્કાલિક અસરથી નાની રાસલી ગામે દીપડાને પાંજરે પૂરવા માટે પાંજરું મુકી આગળની કાર્યવાહી કરવામાં આવી રહી છે. અને ગામમાં સતર્ક રહેવા સૂચના આપવામાં આવી છે.
