બનાસકાંઠા ભૂસ્તર વિભાગ અને ફલાઈંગ સ્કવોર્ડની ટીમે સંયુક્ત ઓપરેશન કરી બુધવારે મધરાત્રે ડીસામાં આખોલ પાસે બનાસ નદીના પુલ નજીક ગેરકાયદેસર રીતે રેતી ચોરીનું નેટવર્ક પકડી 22 ડમ્પર અને એક મશીન જપ્ત કર્યું હતું. અંદાજે રૂપિયા 8 કરોડનો મુદ્દામાલ જપ્ત કરાયો છે.

બનાસકાંઠા જીલ્લામાં બનાસ નદીમાં રેતીની 150 જેટલી લિઝો આવેલી છે.આ ઉપરાંત પણ કેટલાક અસામાજિક તત્વો દ્વારા નદીમાં ગેરકાયદેસર રીતે મશીન મૂકી ખનન કરવામાં આવતું હોવાની વ્યાપક ફરિયાદો ભૂસ્તર વિભાગને અવાર-નવાર મળતી રહે છે. જેથી ભૂસ્તરશાસ્ત્રી ગુરુપ્રીતસિંગ સારસ્વા દ્વારા રેતી ખનીજ ચોરી મામલે વ્યાપક એક્શન લેવાઈ રહ્યા છે. ભૂસ્તર વિભાગ દ્વારા થોડા સમય પહેલા જ કાંકરેજ તાલુકાના અરણીવાડા ગામે રેતી ચોરી સામે રાજ્યનું સૌથી મોટું ઓપરેશન કરી 125 થી વધુ વાહનો અને આઠ જેટલા મશીનો જપ્ત કર્યા હતા.

ત્યારે ડીસા બનાસ નદીના પુલ પાસે ગેરકાયદેસર રીતે ખોદકામ કરવામાં આવતું હોવાની માહિતીના આધારે બનાસકાંઠા ભૂસ્તર વિભાગ ફ્લાઈંગ સ્કવોર્ડની ટીમો બુધવારે મધરાતે ત્રાટકી હતી. જેમાં નદીમાં ગેરકાયદેસર રીતે ખોદકામ કરતાં એક મશીન અને 22 જેટલા ડમ્પરો ઝડપાયા હતા. 

આ અંગે બનાસકાંઠા ભૂસ્તર શાસ્ત્રી ગુરપ્રીતસિંગ સારસ્વાના જણાવ્યા મુજબ, બનાસકાંઠા ભૂસ્તર વિભાગ અને ફલાઇંગ સ્કવોર્ડની ટીમે સંયુક્ત કાર્યવાહી કરી ગેરકાયદેસર રીતે ખોદકામ થતું હોવાથી 22 ડમ્પર અને એક મશીન મળી કુલ અંદાજે રૂપિયા 8 કરોડનો મુદ્દામાલ જપ્ત કર્યો છે. હવે ગેરકાયદેસર ખોદકામ બાબતે માપણી કરી દંડ ફટકારવામાં આવશે.ડીસામાં બનાસ નદીના પુલ પાસે છેલ્લા ઘણા સમયથી ગેરકાયદેસર રીતે ખોદકામ ચાલી રહ્યું હતું.