બનાસકાંઠા જિલ્લાના ગ્રામ્ય વિસ્તારોમાં વીજલાઈનો પર આંકડી મારી વીજચોરીની પ્રવૃત્તિ ઝડપી લેવા ગુજરાત ઉર્જા વિકાસ નિગમ લિમિટેડ વડોદરા દ્વારા મોટી કાર્યવાહી કરવામાં આવી હતી. જેમાં જીયુવીએનએલની 42 જેટલી ટીમો પોલીસ અને એસઆરપીને સાથે રાખી બુધવારે તપાસ કરતાં 105 ગ્રાહકોને વીજ ચોરી કરતા ઝડપાયા હતા. જેમને રૂપિયા 30.71 લાખનો દંડ ફટકાર્યો હતો.

ગ્રામ્ય વિસ્તારોમાં મોટા પ્રમાણમાં વીજ ચોરી થતી હોવાનું ધ્યાને આવતા ગુજરાત ઉર્જા વિકાસ નિગમ લિમિટેડ વડોદરા દ્વારા નક્કર કાર્યવાહી કરવા એક્શન પ્લાન બનાવાયો હતો. જે અંતર્ગત ડીસા,કાંકરેજ અને વાવ તાલુકામાં એક સાથે કાર્યવાહી કરવા જીયુવીએનએલ દ્વારા અલગ-અલગ વીજ ડિવિઝનોની પાંચ પેટા કચેરીની 42 જેટલી ટીમો બનાવવામાં આવી હતી.

જેમાં બુધવારે વહેલી સવારથી ડીસા, કાંકરેજ અને વાવ તાલુકાના ગ્રામ્ય વિસ્તારોમાં વીજ કંપનીની પાંચ પેટા વિભાગીય કચેરી જેમાં ડીસા ગ્રામ્ય-1, ડીસા ગ્રામ્ય-2, ભીલડી, શિહોરી અને વાવની પેટા કચેરીની ટીમો દ્વારા જીયુવીએનએલ પોલીસ અને એસઆરપી ફોર્સને સાથે રાખી એક સાથે કાર્યવાહી કરવામાં આવી હતી.

જેમાં ગ્રામ્ય વિસ્તારોમાં રહેણાંક તેમજ ખેતર વિસ્તારોમાં રહેણાંક અને વાણિજ્ય વીજ જોડાણોનું ચેકિંગ કરતા ત્રણેય તાલુકામાં થઈ કુલ 105 ગ્રાહકો વીજ ચોરી કરતા ઝડપાયા હતા. વીજ ચોરી કરતા ઝડપાયેલા ગ્રાહકોને કુલ રૂપિયા 30.71 લાખનો દંડ ફટકારી આગળની કાર્યવાહી કરવામાં આવી હોવાનું સૂત્રોએ જણાવ્યું હતું.