શહેરના પોષ ગણાતા એવા વિસ્તારની દુકાનમાંથી દારૂની સપ્લાય કરતાં અને વેચતા એક શખ્સને પોલીસ ઝડપી પાડ્યો છે.સાઉથ બોપલના સૌથી મહત્વના ગણાતા સોબો સેન્ટરમાં આવેલી એક દુકાનમાંથી બોપલ પોલીસે દરોડો પાડીને ૨૪ બોટલ વિદેશી દારૂ જપ્ત કરીને એક વ્યક્તિની ધરપકડ કરી છે. જેની પુછપરછમાં સ્થાનિક વિસ્તારમાં દારૂની ખરીદી કરતા વ્યક્તિઓની યાદી પણ પોલીસને મળી છે. જે અંગે પોલીસે તપાસ હાથ ધરી છે. 

 

બોપલ પોલીસને માહિતી મળી હતી કે સોબા સેન્ટરમાં આવેલી ૪૦૪ નંબરની દુકાનમાંથી એક વ્યક્તિ સ્થાનિક વિસ્તારમાં દારૂનું વેચાણ કરે છે અને સપ્લાય પણ કરે છે. જેના આધારે બુધવારે રાતના સમયે દરોડો પાડીને તપાસ કરતા કિરણસિંહ રાજપુત નામનો વ્યક્તિ મળી આવ્યો હતો અને તપાસમાં  ૨૫ હજારની કિંમતનો ૨૫ બોટસ વિદેશી દારૂ મળી આવ્યો હતો. જે અંગે પુછપરછ કરતા તેણે જણાવ્યું હતું તેના કેટલાંક ગ્રાહકો દુકાનમાંથી દારૂ લેવા આવે છે અને કેટલાંક લોકોને તે ડીલેવરી કરતા હતા.  કિરણસિંહને દારૂનો જથ્થો રાજસ્થાનથી મોહન પ્રજાપતિ નામનો વ્યક્તિ પહોંચતો કરતો હતો.  પોલીસે આ અંગે વધુ તપાસ હાથ ધરી છે. જેમાં પોલીસને કિરણસિંહ પાસેથી દારૂ મંગાવનારાઓની યાદી પણ મળી આવી છે.