অন্যান্য প্ৰান্তৰৰ সমান্তৰালকৈ আজি ডিব্ৰুগড়তো দেশৰ ৭৬ সংখ্যক স্বাধীনতা দিৱস উদযাপন কৰা হয়। ৰাজ্য চৰকাৰৰ কৃষি আৰু ডিব্ৰুগড় জিলাৰ অভিভাৱক মন্ত্ৰী অতুল বৰাই ৰাষ্ট্ৰীয় ত্ৰিৰংগা পতাকা উত্তোলন কৰে। ইয়াৰ পূৰ্বে কেবিনেট মন্ত্ৰীগৰাকীয়ে শ্বহীদসকলৰ প্ৰতি শ্ৰদ্ধাঞ্জলি জ্ঞাপন কৰে। ডিব্ৰুগড় জিলাৰ প্ৰশাসনৰ উদ্যোগত চহৰখনৰ চৌকিডিঙ্গি খেলপথাৰত অনুষ্ঠিত হোৱাৰ দেশৰ ৭৬ সংখ্যক স্বাধীনতা দিৱসৰ কাৰ্যসূচীত মূখ্য অতিথি হিচাবে অংশগ্ৰহণ কৰি কেবিনেট মন্ত্ৰীগৰাকীয়ে ভাষনত ৰাজ্য চৰকাৰৰ আমোলত ৰূপায়ন হোৱাৰ বিভিন্ন কৰ্মমূখী আঁচনিৰ সৰ্ম্পকত বক্তব্য আগবঢ়ায়।প্ৰতিকূল বতৰৰ বাবে কাৰ্যসূচীত পূৰ্বতকৈও নাগৰিকৰ উপস্থিতি সংখ্যা কম যদিও চহৰখনৰ বিভিন্ন প্ৰান্তৰৰ পৰা অহাৰ জনসাধাৰণৰ উপস্থিতিত সুচাৰুৰূপে সম্পন্ন কৰা হয় স্বাধীনতা দিৱসৰ কাৰ্যসূচী। খেলপথাৰত আৰক্ষী, অৰ্ধ-সামৰিক বাহিনীৰ আৰু বিদ্যালয়ৰ ছাত্ৰ - ছাত্ৰীসকলৰ দ্বাৰা কুচকাৱাজ প্ৰদৰ্শন কৰা হয়। লগতে বৰ্ণাঢ্য সাংস্কৃতিক কাৰ্যসূচীও সম্পন্ন কৰা হয়। আজি কাৰ্যসূচীত কেবিনেট মন্ত্ৰীগৰাকীৰ লগত বিধায়ক প্ৰশান্ত ফুকন, পোনাকণ বৰুৱাকে ধৰি অন্যান্য চৰকাৰী বিষয়াসকলে অংশগ্ৰহণ কৰি সহযোগিতা আগবঢ়ায়।