বুধবাৰে বিয়লি নাৰায়ণপুৰ প্ৰেছ ক্লাবত অনুষ্ঠিত এক সংবাদমেলৰ জৰিয়তে নাৰায়ণপুৰ পৌৰসভাই ১৩ আগষ্টৰ পৰা ১৫ আগষ্টলৈকে দেশৰ আজাদী কা অমৃত মহোৎসৱ আৰু স্বাধীনতা দিৱস উদ্‌যাপন সম্পৰ্কে তিনিদিনীয়া কাৰ্যসুচী প্ৰকাশ কৰে ৷ আজাদী কা অমৃত মহোৎসৱ উপলক্ষ্যে এইবাৰ নাৰায়ণপুৰ নগৰৰ এক নম্বৰ ৱাৰ্ডত অৱস্থিত ঐতিহাসিক খোলচোৱা পুখুৰীত অমৃত সৰোবৰ মেলা নামেৰে তিনিদিনীয়া কাৰ্যসুচীৰে স্বাধীনতা দিৱস উদ্‌যাপন কৰা হ’ব ৷ সেইউপলক্ষ্যে তেৰ আগষ্টত পুৱা ৯ বজাত পৌৰসভাৰ কাৰ্যবাহী বিষয়া জিন্টু শৰ্মাই জাতীয় পতাকা উত্তোলন কৰি অমৃত সৰোবৰ মেলা উদ্ধোধন কৰিব ৷ ইয়াৰ পাছতে পৌৰসভাৰ অন্তৰ্গত বিদ্যালয়ৰ ষষ্ঠ শ্ৰেণীৰ ছাত্ৰ-ছাত্ৰীক লৈ শ্বহীদ কনকলতা বৰুৱা জন্মস্থানলৈ বুলি শিক্ষামুলক ভ্ৰমন আৰম্ভ হ’ব ৷ দিনটোত বৃক্ষৰোপন , চিত্ৰাংকন আৰু ৰচনা , বাটৰ নাট , ফেঞ্চি ড্ৰেচ প্ৰতিযোগিতা আৰু নাৰায়ণপুৰ কাব্য কাননৰ উদ্যোগত কবি সন্মিলন অনুষ্ঠিত হ’ব ৷ ১৪ আগষ্টত  ঐতিহাসিক ফুলনি থানৰ পৰা জল আহৰণ কৰি অমৃত সৰোবৰত শুদ্ধিকৰণ কৰাৰ অন্তত ৯ বজাত জাতীয় পতাকা উত্তোলন কৰিব পৌৰপতি হৰিশ চন্দকে ৷ দুটাকৈ বিষয়ত আলোচনা সত্ৰ অনুষ্ঠিত হোৱাৰ লগতে দিনটোত দেশপ্ৰেমমূলক গীত আৰু নৃত্য প্ৰতিযোগিতা , খোলচোৱা পুখুৰীৰ ইতিহাসৰ পত্ৰিকা উদ্ধোধন আৰু ৰাতিলৈ সাংস্কৃতিক অনুস্থান ৰুপায়ন কৰা হ’ব ৷ ১৫ আগষ্টত খোলচোৱা পুখুৰীত ৬০ ফুট উচ্চতাত জাতীয় পতাকা উত্তোলন কৰিব বিধায়ক অমিয় কুমাৰ ভূঞাই ৷ তাৰোপৰি ৭৪ খন জাতীয় পতাকা উত্তোলন কৰিব বিশিষ্ট ব্যক্তিসকলৰ দ্বাৰা ৷ দিনটোত সমবেত সংগীত চিলা উৰুৱা প্ৰতিযোগিতাৰ লগতে পুৰস্কাৰ বিতৰণৰ শেষত বিয়লি ৪:৩০ বজাত ৭৫ খন পতাকা অৱনমনৰ অন্তত সামৰণি পৰিব তিনিদিনীয়া কাৰ্যসুচীৰ ৷