ધ્રાંગધ્રા તાલુકાના રાવળિયાવદર ગામના સરપંચ સહિત 5 શખસ દારૂ પીધેલી હાલતમાં લીંબડી પોલીસે ઝડપી પાડ્યા હતા. પાંચેય દારૂડિયા વિરુદ્ધ ગુનો નોંધી તેમની પાસેથી 2.50 લાખનો મુદ્દામાલ કબજે કરવામાં આવ્યો છે. લીંબડી નેશનલ હાઈ-વે પર પીએસઆઈ બી.કે.મારૂડા, અજયભાઈ ચિહલા સહિત પોલીસ ટીમ દ્વારા રાત્રી પેટ્રોલીંગ અને વાહન ચેકિંગ કામગીરી હાથ ધરવામાં આવી હતી.ત્યારે ત્યાં એક કાર ગફલતભરી રીતે હંકારી આવી રહી હતી. પોલીસ ટીમે કારને કોર્ડન કરી ઊભી રખાવી હતી. કારમાં સવાર ધ્રાંગધ્રા તાલુકાના રાવળિયાવદર ગામના સરપંચ રતનસિંહ સોમાભાઈ સારોલા, વાઘજી કુકાભાઈ અઘારા, શંભુ પ્રભુભાઈ સારોલા, રાણાભાઈ વેરશીભાઈ ભગારા, બળદેવ ભાથીભાઈ અઘારા દારૂ પીધેલી હાલતમાં મળી આવ્યા હતા. પોલીસે પાંચેય શખસો અને કાર સહિત મુદ્દામાલ ઝડપી ફરિયાદ નોંધી હતી.