સુરેન્દ્રનગરના જીનતાન રોડ ઉપર ઓફીસમાં ચાલતી દારૂની મહેફીલ ઉપર દરોડો પાડીને પોલીસે ચાર શખ્સોને નશાની હાલતમાં ઝડપી લઈ રૂા.3,45,100 નો મુદામાલ કબજે કર્યો હતો.શહેરના જીનતાન રોડ ઉપર આવેલા પ્રતિક વેલી એપાર્ટમેન્ટ પાસે આવેલી ઓફીસ નં 45માં કેટલાક શખ્સો દારૂની મહેફીલ માણી રહ્યા હોવાની બાતમી મળતા બી ડીવીઝન પોલીસની ટીમે દરોડો પાડયો હતો. જેમાં ભાવેશ લાભુભાઈ સાવધરીયા,લીંબાભાઈ ભીખાભાઈ આલ, સુનિલ પ્રવિણભાઈ રબારી અને રૂતુરાજભાઈ લાલજીભાઈ આલ નામના શખ્સો અંગ્રેજી દારૂ અને બિયરની મહેફીલ માણતા રંગેહાથ ઝડપાયા હતા.ઓફીસની બહાર પડેલી કારની તલાશી લેતા તેમાંથી ધારીયુ મળી આવ્યુ હતુ. પોલીસે ઓફીસ ભાડે રાખનાર અને મહેફીલ માણનાર ભાવેશ લાભુભાઈ સાવધરીયા સહીત ચારેય શખ્સો સામે ગુનો દાખલ કર્યો હતો. તેમજ કારમાંથી ધારીયુ મળી આવતા રૂતુરાજ લાલજીભાઈ આલ સામે અલગથી ગુનો દાખલ કરવામાં આવ્યો હતો. તેમજ બિયરનું ટીન, દારૂની બોટલ, બે મોબાઈલ ફોન,કાર, ધારીયુ વગેરે મળી કુલ રૂા.3,45,100નો મુદામાલ જપ્ત કરી ધોરણસર કાર્યવાહી કરી હતી.