કામરેજના પરબ ગામે આવેલા સુખ શાંતિ ઇન્ડસ્ટ્રીયલ એસ્ટેટમાં આવેલા ભોજલ ફેશનમાં ₹.1.28 લાખના મુદ્દામાલની ચોરીનો ભેદ LCB એ ફરિયાદ બાદ બીજે જ દિવસે ઉકેલી નાંખ્યો.સરથાણાની વ્રજ રાજ રેસી.ખાતે રહેતા અલ્પેશ સાવલિયાના પરબ ગામે આવેલા ભોજલ ફેશન નામના ખાતા માંથી ₹.1.28 લાખની કિંમતના સિલાઈ મશીન તેમજ સાડી ચોરી થયા અંગેની ફરિયાદ કામરેજ પોલીસ મથકે બુધવારે તેમણે નોંધાવી હતી.LCB પી.આઇ બી. ડી શાહની આગેવાનીમાં પોલીસ સ્ટાફ ગુનાના ભેદ ઉકેલવા તપાસ હાથ ધરી હતી.ત્યારે બાતમી અને હકીકતને આધારે ચોરીના આરોપી અને ચલથાણ મરઘાં કેન્દ્ર પાસે રહેતા સુનીલ ઉર્ફે મુગલી સુરેશ વસાવાને એલસીબી પોલીસે પરબ થી જોળવા તરફ જતા રસ્તા પરથી ઝડપી પાડયો હતો.પોલીસે તેની પાસેથી ₹.48 હજારની કિંમતના 6 સિલાઈ મશીન તેમજ ₹.80 હજારની કિંમતની 200 નંગ સાડી સહિત કુલ 1.28 લાખની કિંમતનો મુદ્દામાલ કબ્જે કર્યો હતો.જ્યારે ચોરીમાં સામેલ અને જોળવા ખાતે રહેતા રાધે નામના અન્ય આરોપીને ફરાર જાહેર કર્યો હતો.