গোলাঘাট জিলাৰ ধনশিৰি মহকুমাত বাঘৰ আক্ৰমণত গুৰুত্বৰ ভাবে আহত গৰ্ভৱতী মহিলাকে ধৰি তিনিজন। আহত তিনিজনক গোলাঘাট শ্বহীদ কুশল কোঁৱৰ অসামৰিক চিকিৎসালয়ত ভৰ্তি। গোলাঘাট জিলাৰ ধনশিৰি মহকুমাৰ অন্তৰ্গত টেঙানীত বাঘৰ আক্ৰমণত গুৰুত্বৰ ভাবে আহত হয় এগৰাকী গৰ্ভৱতী মহিলা সহ তিনিজন। ঘটনাৰ বিবৰণ অনুসৰি ধনশিৰি মহকুমাৰ টেঙানী ১ নং কেকুৰী গাঁৱত এগৰাকী গৰ্ভৱতী মহিলাই গৰু বান্ধিবলৈ যোৱাৰ সময়তে হঠাৎ এটা বাঘে মহিলা গৰাকীক আক্ৰমণ কৰে ঠিক সেই সময়তে ওচৰৰ বাগিচাত কাম কৰি থকা মহিলা গৰাকীৰ ভায়েকে দৌৰি আহি বচাবলৈ চেষ্টা কৰোতে তেখেতকো আক্ৰমণ কৰে। ইয়াৰ পাছতে বাঘটোয়ে আক্ৰমণ কৰে আন এজন লোকক। উক্ত ঘটনা সংঘটিত হোৱাৰ পাছত স্থানীয় ৰাইজে ততাতৈয়াকৈ আহত তিনিজনক গোলাঘাট শ্বহীদ কুশল কোঁৱৰ অসামৰিক চিকিৎসালয়ত ভৰ্তি কৰাই। আহত হোৱা লোক কেইজন ক্ৰমে পিংঙ্কি শইকীয়া, মাইনা শইকীয়া আৰু যোগেন শইকীয়া। ইয়াৰে যোগেন শইকীয়া নামৰ লোকজন অধিক সংকটজনক বুলি জানিব পৰা গৈছে। উক্ত ঘটনাক কেন্দ্ৰ কৰি অঞ্চলটোত এতিয়া আতংকৰ সৃষ্টি হৈছে।