मनोजकाकाने अत्याचार केला, मुलीचा दावा; आरोपी म्हणतो मग २ महिन्यांनी माझ्या लग्नाला का आलीस?
मुंबई : अत्याचाराची घटना मार्च २०१७ मध्ये घडली असेल, तर पीडित मुलगी आणि तिचे कुटुंब मे २०१७ मध्ये त्यांच्या गावात आरोपीच्या लग्नाला कसे उपस्थित होते, याकडेही आरोपीने लक्ष वेधलं.मित्राच्या मुलीवर बलात्कार केल्याप्रकरणी मुंबईकर आरोपीला दहा वर्षांच्या कारावासाची शिक्षा सुनावण्यात आली आहे. घरात एकटी असताना मनोज काकाने येऊन आपल्यावर लैंगिक अत्याचार केल्याचा आरोप पीडित मुलीने केला होता. आरोपीने मात्र आपले एकमेकांवर प्रेम असल्याचा दावा केला. तसंच कथित घटनेनंतर दोन महिन्यांनी फिर्यादी तरुणी आपल्या कुटुंबासह माझ्या लग्नाला कशी आली? असा प्रश्नही त्याने उपस्थित केला होता.मुलीने पोटात दुखत असल्याची तक्रार केल्यानंतर कुटुंबीयांनी तिला मुंबईतील घाटकोपर पूर्वेला असलेल्या एका रुग्णालयात नेलं होतं. तिथे मुलीची तपासणी करणाऱ्या डॉक्टरांनी ती साडेचार महिन्यांची गर्भवती असल्याचं सांगितलं होतं. आईने लेकीकडे खोदून विचारलं असता, पीडितेने सांगितलं की, त्याच वर्षी (२०१७) मार्च महिन्यात ती जेव्हा घरी एकटी होती, तेव्हा आरोपी, ज्याला मुलगी 'मनोज काका' म्हणत असे, याने येऊन तिच्यावर लैंगिक अत्याचार केला. ही घटना कोणाला सांगितल्यास जीवे मारण्याची धमकीही आरोपीने दिल्याचं तिने सांगितलं होतं. एका आठवड्यानंतर आरोपीने पुन्हा एकदा आपल्यावर लैंगिक अत्याचार केल्याचेही मुलीने तिच्या आईला सांगितले होते. त्यानंतर आईने ८ जुलै २०१७ रोजी एफआयआर नोंदवला होता. घटनेच्या वेळी मुलीचे वय १५ वर्ष असल्याचा दावा करण्यात आला होता.दरम्यान, कोर्टात आरोपीने मुलीच्या वयावर प्रश्नचिन्ह निर्माण केले. कारण एका प्रमाणपत्रावर काहीतरी पुन्हा गिरवल्याचे दिसत होते. पीडितेने घटनेची कोणतीही तारीख सांगितली नाही आणि दंडाधिकार्‍यांसमोर दिलेल्या जबानीत तिने आपले नाव घेतले नव्हते, ही गोष्टही आऱोपीने कोर्टाच्या निदर्शनास आणली होती.कथित घटना मार्च २०१७ मध्ये घडली असेल, तरी पीडित मुलगी आणि तिचे कुटुंब मे २०१७ मध्ये त्यांच्या गावात आरोपीच्या लग्नाला उपस्थित होते, याकडेही आरोपीने लक्ष वेधलं.मार्च २०१७ मध्ये झालेल्या लैंगिक अत्याचाराच्या वेळी पीडितेचे वय १८ वर्षांपेक्षा कमी असल्याचे स्पष्टपणे सिद्ध करण्यात फिर्यादी अयशस्वी ठरल्याचे न्यायालयाने मान्य केले. त्याप्रमाणे, पॉस्को कायद्याच्या आरोपातून आरोपीची निर्दोष मुक्तता करण्यात आली. मात्र लैंगिक शोषण आणि अत्याचार हे गंभीर गुन्हे असून त्याकडे प्रभावीपणे लक्ष देण्याची गरज असल्याचे निरीक्षण नोंदवत न्यायाधीशांनी आरोपीला लैंगिक अत्याचारासाठी दोषी ठरवले.न्यायमूर्ती जयश्री पुलाटे म्हणाल्या, "माझ्या मते, पीडितेने आणि तिच्या कुटुंबीयांनी आरोपीच्या विवाह समारंभाला उपस्थित राहणे हे पीडितेवर अविश्वास दाखवण्याचे कारण असू शकत नाही, कारण तिने अत्याचाराविषयी तोंड उघडल्यास जीवे मारण्याची धमकी आरोपीकडून देण्यात आली होती. अशा प्रकारे आरोपीच्या खोट्या आरोपाचा बचाव रेकॉर्डवर सिद्ध झालेला नाही."पीडितेचे आपल्यावर प्रेम होते, या आरोपीच्या दाव्याचे मुलीने उलटतपासणीत खंडन केले होते. "लैंगिक गुन्हे हे नेहमीच गुप्ततेत केले जातात" हे लक्षात घेऊन न्यायाधीश म्हणाल्या, की "जेव्हा पीडितेने सांगितले की आरोपीने तिला जीवे मारण्याची धमकी दिली, त्यानुसार "तिच्या जबानीवर अविश्वास ठेवण्याचे कोणतेही कारण उरत नाही." मुलगी आणि आरोपी हे गर्भपात झालेल्या गर्भाचे जैविक पालक होते, या डीएनए अहवालाचा निष्कर्षही न्यायालयाने लक्षात घेतला.आरोपी सहा वर्षांपासून कोठडीत होता. त्याचा चिमुकला मुलगा आणि वृद्ध आई-वडिलांकडे पाहून न्यायालयाने सूट द्यावी अशी अपेक्षा त्याने व्यक्त केली. मात्र आरोपीने केलेल्या कृत्यांचा विचार करता, दहा वर्षांची शिक्षा योग्य असल्याचे न्यायाधीशांनी सांगितले.
