বিগত সময়ত বিশ্বনাথৰ বিভিন্ন অঞ্চলত চুৰি হোৱা সামগ্ৰীৰে ভৰি পৰিছে বিশ্বনাথ চাৰিআলি সদৰ আৰক্ষী থানা।আজি বিশ্বনাথ সদৰ আৰক্ষী থানাই অভিযান চলাই উদ্ধাৰ কৰিবলৈ সক্ষম হয় বৃহৎ পৰিমানৰ কাঁহ-পিতলৰ সামগ্ৰী সহ এঘাৰ জনকৈ গভাইত চোৰক।এই ১১ জনীয়া গভাইত চোৰৰ দলটোৰ ভিতৰত অধিকাংশ চোৰেই হ'ল নাবালক।কিন্তু নাবালক বুলি ভুল নাযাব।কাৰণ এই চোৰৰ দলটোয়ে বিশ্বনাথত দীৰ্ঘদিনে এক আতংকময় পৰিবেশ সৃষ্টি কৰি আহিছিল।ঘৰত মানুহ নথকা অৱস্থাত এই চোৰৰ দলটোয়ে বিগত সময়ত ঘৰৰ তলা ভাঙি চলাই আহিছিল চাফাই আভিযান।আনকি,এই চোৰৰ দলটোয়ে মূল্যৱান আ-অলংকাৰ লগতে ঘৰৰ কাঁহ-পিতলৰ কাঁহি বাতি চোৰ কৰাৰ লগতে চৰুৰ ভাত পৰ্যন্ত খায় সেই চৰুত মল ত্যাগ কৰি অত্যাচাৰ চলাই আহিছিল গৃহস্থক।বিশ্বনাথৰ সাধাৰণ জনতাৰ লগতে বিশ্বনাথ আৰক্ষীৰো এক মুৰৰ কামোৰণি স্বৰূপ হৈ পৰিছিল এই চোৰৰ দলটো।অৱশেষত যোৱা নিশা বিশ্বনাথ চাৰিআলি সদৰ আৰক্ষী থানাৰ উপ আৰক্ষী বিষয়া অনিল সোণোৱাল নেতৃত্বত আৰু ভাৰপ্ৰাপ্ত আৰক্ষী বিষয়া ছামদান হাজোৱাৰীৰ নিৰ্দেশত বিশ্বনাথৰ নীলপুৰ চাহ বাগিচাৰ সমীপৰ দীঘলী পুখুৰীৰ পৰা অভিযান চলাই এই ১১ জনকৈ গভাইত চোৰক কৰায়ত্ত কৰি তদন্ত অব্যাহত ৰাখাৰ লগতে উদ্ধাৰ কৰে বৃহৎ পৰিমাণৰ কাঁহ পিতলৰ সামগ্ৰী পানীৰ মটৰ আৰু ছাউণ্ড চিষ্টেম।