মেৰাপানীৰ দৈয়াং মহাবিদ্যালয়ৰ উপাধ্যক্ষ, বিশিষ্ট নিবন্ধকাৰ, লেখক মনোজ কুমাৰ শইকীয়াৰ কালি গুৱাহাটী চিকিৎসা মহাবিদ্যালয় হস্পিতালত চিকিৎসাধীন হৈ থকা অৱস্থাত দেহাৱসান ঘটে। দৈয়াঙৰ বৌদ্ধিক জগত এক চিনাকী নাম মনোজ কুমাৰ শইকীয়াৰ মৃত্যুত মেৰাপানীত শোকৰ ছাঁ পৰিছে। তেখেতৰ অকাল মৃত্যুত দৈয়াঙৰ বৌদ্ধিক ক্ষেত্ৰ, উত্তৰ প্ৰজন্ম আৰু অসমীয়া সাহিত্য জগতৰ এক অপূৰণীয় ক্ষতি হৈছে। তেখেতৰ নৰশ্বৰ দেহ গুৱাহাটীৰ পৰা আহি পোৱাৰ পাছতেই তেওঁৰ কৰ্মস্থলী দৈয়াং মহাবিদ্যালয়ত অঞ্চলটোৰ বিভিন্ন অনুষ্ঠানৰ লগতে দৈয়াং সাহিত্য সভা, গোলাঘাট জিলা ছাত্ৰ সন্থা, যুৱ ছাত্ৰ পৰিষদ, মেৰাপানী বজাৰ সমিতি, মেৰাপানী মহকুমা সাংবাদিক সন্থা আদিয়ে অন্তিম শ্ৰদ্ধাঞ্জলি জ্ঞাপন কৰে। শইকীয়াৰ বিয়োগত বিত্তমন্ত্ৰী অজন্তা নেওগে শোক প্ৰকাশ কৰি গোলাঘাটৰ বৌদ্ধিত আৰু সামাজিক ক্ষেত্ৰখন শূণ্যতাৰ সৃষ্টি হ'ল বুলি উল্লেখ কৰে।