নাৰায়ণপুৰ শিক্ষাখন্ডৰ অন্তৰ্গত কথাজান দেউৰী মধ্য ইংৰাজী বিদ্যালয়ত যোৱা ১২ ডিচেম্বৰৰ পৰা অনুষ্ঠিত বাৰ্ষিক ক্ৰীড়া , সাহিত্য আৰু কৃষ্টি প্ৰতিযোগিতাৰ ১৬ ডিচেম্বৰৰ দিনটোত বাৰ্ষিক অধিৱেশন অভিভাৱক সন্মিলন আৰু বঁটা বিতৰণী সভাৰে সামৰণি পৰে ৷ ১২ ডিচেম্বৰত পুৱা প্ৰধান শিক্ষক জিতেন শইকীয়াই পতাকা উত্তোলনেৰে শুভাৰম্ভ কৰা বিদ্যালয় সপ্তাহৰ ১৫ ডিচেম্বৰলৈকে অনুষ্ঠিত হয় ক্ৰীড়া , সাহিত্য প্ৰতিযোগিতা আৰু ছাত্ৰ সংসদ গঠন ৷ ১৬ ডিচেম্বৰৰ অন্তিম তথা সামৰনি অনুষ্ঠানৰ দিনটোত পুৱা অনুষ্ঠিত হয় কৃষ্টি প্ৰতিযোগিতা ৷ দিনৰ ১২ বজাৰ পৰা অনুষ্ঠিত হয় মুল সভা , একাংক নাট আৰু ফেশ্বন’শ্ব প্ৰতিযোগিতা ৷ বিদ্যালয়ৰ অৱসৰপ্ৰাপ্ত প্ৰধান শিক্ষক দেবেশ্বৰ শইকীয়াৰ সভাপতিত্বত অনুষ্ঠিত মুল সভাত মুখ্য অতিথি ৰুপে উপস্থিত থাকে দেউৰী পৰিষদৰ পিছলা সমষ্টিৰ প্ৰতিনিধি ৰিংকুমনী দেউৰী , বিশিষ্ট অতিথি ৰুপে উপস্থিত থাকে নাৰায়ণপুৰ খন্ড প্ৰাথমিক শিক্ষা বিষয়া দেবেশ্বৰ বৰা , সমল ব্যক্তি বসন্ত হাজৰিকা আৰু দেউৰী পৰিষদৰ প্ৰাক্তন অধ্যক্ষ বিষ্ণু কুমাৰ দেউৰী ৷ সন্ধিয়া পুষ্পাঞ্জলি দেউৰীৰ দ্বাৰা বন্তি প্ৰজ্বলন কৰাৰ অন্তত ছাত্ৰ-ছাত্ৰীসকলৰ দ্বাৰা আলোক নৃত্য প্ৰতিযোগিতা অনুষ্ঠিত হয় ৷ বিদ্যালয়ৰ ছাত্ৰ-ছাত্ৰীসকলে প্ৰতিযোগিতাসমুহত অংশগ্ৰহণ কৰি উন্নত ফল দেখুৱাবলৈ সক্ষম হোৱাত প্ৰধান শিক্ষক জিতেন শইকীয়াৰ লগতে শিক্ষাগুৰু আৰু অভিভাৱকসকলে সন্তুষ্টি প্ৰকাশ কৰি বিদ্যালয়খনৰ উত্তৰোত্তৰ কামনা কৰে ৷ শেষত সাংস্কৃতিক সন্ধ্যাৰে সামৰণি পৰে বিদ্যালয় সপ্তাহৰ কাৰ্যসুচী ৷