এজন পুত্ৰৰ পিতৃস্নেহ। পিতৃৰ স্মৃতি সমাজৰ আগত সজীৱ কৰি লক্ষ্যৰে টিংখাঙৰ এজন সু-পুত্ৰই পিতৃৰ নামত এখন বিদ্যালয়লৈ আগবঢ়াইছে এটা ডিজিটেল শ্ৰেণীকক্ষ। উল্লেখযোগ্য যে টিংখাঙৰ ঔফুলীয়া উচ্চ মাধ্যমিক বিদ্যালয়ত ছাত্ৰ ছাত্ৰীৰ অধ্যয়নৰ বাবে অভাৱ আছিল এটা ডিজিটেল শ্ৰেণীকোঠাৰ। ছাত্ৰ-ছাত্ৰীৰ সেই অভাৱৰ কথা অৱগত হৈ চৰকাৰী অনুদানৰ বাবে অপেক্ষা নকৰি নিজৰ গাঁঠিৰ ধন খৰচ কৰি বিদ্যালয়খনলৈ এটা ডিজিটেল কক্ষ আগবঢ়াই এজন সু-নাগৰিকৰ পৰিচয় দিছে টিংখাং ঔফুলীয়াৰ মদন হাজৰিকা নামৰ উদ্যোগি ব্যক্তিজনে। আৰু এই বিশেষ শ্ৰেণীকোঠাটো উচৰ্গা কৰিছে নিজ পিতৃ প্ৰয়াত টেপুৰাম হাজৰিকাৰ নামত। বৃহস্পতিবাৰে এই ডিজিটেল শ্ৰেণী কোঠাৰ আধাশিলা স্থাপন কৰে টিংখাঙৰ বিধায়ক তথা মন্ত্ৰী বিমল বৰাই। স্বৰ্গীয় টেপুৰাম হাজৰিকাৰ স্মৃতিত পুত্ৰ মদন হাজৰিকাই দান কৰা শ্ৰেণী কোঠাটোৰ আধাশিলা অনুষ্ঠানৰ লগত সংগতি ৰাখি এখন সভাও অনুষ্ঠিত হয় । সভাখনত মন্ত্ৰী বৰাই ভাষণ প্ৰদান কৰি ছাত্ৰ-ছাত্ৰী সকলক অধ্যয়নৰ প্ৰতি মনোযোগ দিবলৈ আহ্বান জনায় । মন্ত্ৰীজনে ছাত্ৰ-ছাত্ৰী সকলক মঞ্চৰ কাষলৈ মাতি আনি পঢ়াৰ লগতে জীৱন বাটত আগবাঢ়ি যাব পৰা বহু ধৰণৰ নীতি-শিক্ষা প্ৰদান কৰে ।