रत्नागिरी जिल्हा न्यायालयात 'तारीख पे तारीख'ला कंटाळलेल्या एका तरुणाने न्यायालयातच धिंगाणा घातला. समजावून देखील तरुण समजत नसल्याने अखेर त्या तरुणाला शहर पोलिसांच्या ताब्यात देण्यात आले. सविस्तर घटना अशी की, रत्नागिरी कोकण नगर येथील तरुणाला एका खटल्यात साक्षीदार म्हणून तारखेला जावं लागत होतं. मात्र तिथे पुन्हा तारीख मिळाल्याने त्याने गोंधळ घातला. एवढा गोंधळ घातला की कोर्टातील सारा परिसर दणाणून गेला. सारे त्याच्याकडे बघत होते. मात्र तो काही केल्या थांबत नव्हता. सिराज समीर रणदिवे (३२, रा. कोकणनगर, रत्नागिरी) असे या तरुणाचे नाव आहे. खटल्याची सुनावणी लांबणीवर पडत असल्याने संतापलेल्या सिराजने न्यायालय परिसरात शुक्रवारी दुपारी १२.३० च्या सुमारास जोरदार आरडाओरडा केला. त्याच्या गोंधळाकडे वकील वर्गांसह न्यायालयात आलेले लोक पाहत होते. न्यायालयातील कर्मचाऱ्यांनी त्याला समजावण्याचा प्रयत्न केला. मात्र तो ऐकण्याच्या मनस्थितीत नव्हता. वारंवार समजावून ऐकत नसल्याने शेवटी कर्मचाऱ्यांनी पोलिसांना बोलावून घेतले. शहर पोलीस घटनास्थळी दाखल झाले. त्यांनी सिराजला ताब्यात घेत शहर पोलीस ठाण्यात आणले. त्याच्यावर महाराष्ट्र पोलीस कायदा कलम ११० व ११७ नुसार प्रतिबंधात्मक कारवाई करण्यात आली.