औरंगाबाद:- (दीपक परेराव) नॅशनल डिफेन्स अकॅडमी (NDA) प्रवेश परीक्षेचा निकाल नुकताच जाहीर झाला. यामध्ये मराठवाडा शिक्षण प्रसारक मंडळाच्या औरंगाबाद येथील देवगिरी ग्लोबल अकॅडमीची माजी विद्यार्थीनी कु.अनुष्का अनिल बोर्डे हीने मुलींमधून देशातून प्रथम तर सर्वांमधून द्वितीय 'रँक' मिळवला आहे.

या उल्लेखनीय कामगिरीबद्दल आज आमदार सतीश चव्हाण यांनी अनुष्काचा सत्कार करून तीला पुढील वाटचालीस शुभेच्छा दिल्या. याप्रसंगी अनुष्काची आई श्रीमती मनिषा बोर्डे, मशिप्र मंडळाचे कार्यकारिणी सदस्य श्री.किरण आवरगावकर, श्री.अभिनंदन बोर्डे, प्रशिक्षक श्री.अभिजीत पवार आदींची उपस्थिती होती.

जिद्द, चिकाटी व इच्छा शक्तीच्या जोरावर अनुष्काने प्राप्त केलेले यश आमच्या संस्थेसाठीच नव्हे तर संपूर्ण मराठवाड्यासाठी निश्चितच भूषणावह असल्याचे आमदार सतीश चव्हाण यांनी याप्रसंगी सांगितले...