টিংখাঙৰ নামদাং সংৰক্ষিত বনাঞ্চলৰ কাষৰীয়া বনগাঁৱত বছৰ বছৰ ধৰি বসবাস কৰাৰ লগতে কৃষিকৰ্মৰে স্বাৱলম্বী গঞা ৰাইজ এতিয়া উচ্চেদৰ আশংকাত ভূগিব লগীয়া হৈছে ৷ অঞ্চলটোৰ মুঠ ২০ হেক্টৰ ভূমিত শেহতীয়াকৈ বন বিভাগৰ দ্বাৰা বনানিকৰণৰ আঁচনি গ্ৰহন কৰাৰ পাছতে কৃষিকৰ্মৰ ক্ষেত্ৰত বাধা আৰোপ কৰিছে বনবিভাগে ৷ বছৰ বছৰ ধৰি নামদাং বনাঞ্চলৰ এলেকাধীন উক্ত অঞ্চলত বিভিন্ন কৃষিকৰ্মৰে স্বাৱলম্বী হোৱা খিলঞ্জীয়া লোকসকলক প্ৰথমে বন বিভাগে বনানিকৰণৰ জৰিয়তে উপকৃত হ'ব বুলি আশা দেখুৱাইছিল যদিও শেহতীয়াকৈ কাটা তাঁৰৰ বেৰা নিৰ্মাণ কৰাত শংকিত হৈ পৰিছে ৰাইজ ৷ এই সন্দৰ্ভত উক্ত অঞ্চলত বসবাস আৰু কৃষিকৰ্ম কৰা প্ৰায় শতাধিক পৰিয়ালে অসম চৰকাৰলৈ ব্যৱস্থা গ্ৰহনৰ আহ্বান জনাইছে ।