16વર્ષની તરૃણીને લગ્નની લાલચે ભગાડી જઈ બળાત્કાર ગુજારી  પોક્સો એક્ટના ભંગના ગુનામાં સચીન જીઆઈડીસી પોલીસે જેલભેગા કરેલા આરોપીના જામીનની માંગને આજે એડીશ્નલ સેશન્સ જજ શકુંતલાબેન એન. સોલંકીએ નકારી કાઢી છે.

સચીન જીઆઈડીસી પોલીસ મથકના હદમાં રહેતી 16 વર્ષની વયની તરૃણીને 27 વર્ષીય આરોપી સલમાન ઉર્ફે સિંઘમ ઉર્ફે દાદા સત્તાર રઝાક શાહ (રે. ખ્વાઝા નગર, માનદરવાજા  સલાબતપુરા)એ લગ્નની લાલચે ભગાડી જઈને તેની ઈચ્છા વિરુધ્ધ શરીર સંબંધ બાંધીને બળાત્કાર ગુજાર્યો હતો. જે અંગે ભોગ બનનાર તરૃણીની માતાએ નોધાવેલી ફરિયાદના આધારે આરોપી સલમાનની સચીન જીઆઈડીસી પોલીસે ધરપકડ કરી જેલભેગા કર્યો હતો. હાલમાં જેલવાસ ભોગવતા આરોપીએ જામીન માટે માંગ કરી હતી. બચાવપક્ષે જણાવ્યું હતું કે આરોપી તથા ભોગ બનનાર વચ્ચે પ્રેમસંબંધ હોઈ ભોગ બનનાર પોતાની સ્વેચ્છાએ તેનું ઘર છોડીને આરોપી સાથે ગઈ છે.   આરોપીની ઉંમર 27વર્ષ હોવા ઉપરાંત ગુનાઈત ઈતિહાસ નથી.

જેના વિરોધમાં સરકારપક્ષે એપીપી મુંજાલ બ્રહ્મભટ્ટે જણાવ્યું હતું કે આરોપીએ ભોગ બનનાર તરૃણી 16 વર્ષની હોવાનું જાણવા છતાં તેને ભગાડી જઈને ઈચ્છા વિરુધ્ધ બળાત્કાર ગુજાર્યો છે. આરોપી પરપ્રાંતીય હોઈ જામીન આપવાથી ટ્રાયલમાં હાજર ન રહે તથા સાક્ષી પુરાવા સાથે ચેડા કરે તેવી સંભાવના છે. તદુપરાંત તાજેતરમાં સુપ્રિમ કોર્ટે પોક્સો કેસમાં પ્રેમસંબંધ જામીન માટેનું ગ્રાઉન્ડ બની શકે નહીં તેવો પ્રસ્થાપિત ચુકાદાનું તારણ રજુ કર્યું હતુ.