নাৰায়ণপুৰ ৰাজহচক্ৰৰ অন্তৰ্গত পানবাৰী গাঁৱত ভাদমহীয়া নামৰ প্ৰসাদ খায় বিষক্ৰিয়াত আক্ৰান্ত হ’ল ডেৰ শতাধিক লোক ৷ যোৱাকালি বিয়লি ভাগত পানবাৰী বৰ নামঘৰত প্ৰসাদ খোৱাৰ পাছত উপস্থিত সকলো লোক পেটৰ সমস্যাত ভোগে ৷ পৰৱৰ্তী সময়ত ইজনৰ পাছত সিজন লোক আক্ৰান্ত হোৱাৰ লগতে স্বাস্থ্য অৱনতি ঘটাত অধিকাংশ লোকক নিশাই নাৰায়ণপুৰস্থিত আদৰ্শ চিকিৎসালয়ত ভৰ্তি কৰোৱা হৈছিল ৷ চিকিৎসা প্ৰদান কৰাৰ অন্তত সকলো লোক নিশাই ঘৰমুৱা হৈছিল যদিও আজি পুৱাৰে পৰা অধিকাংশ লোকৰ পুনৰ পেটৰ বিষ শৌচ বমি হোৱাত পুনৰ চিকিৎসালয় খনত ভৰ্তি কৰোৱা হৈছে ৷ চিকিৎসকে আক্ৰান্ত সকলো বিপদমুক্ত বুলি জানিবলৈ দিছে ৷ ইফালে প্ৰসাদত বিষক্ৰিয়া হোৱা ঘটনাই নাৰায়ণপুৰ অঞ্চলত ৰাইজক শংকিত কৰি তুলিছে ৷ কাৰণ নাৰায়ণপুৰ অঞ্চলত ভাদমাহত প্ৰতিটো নামঘৰত ভাদমহীয়া নাম লোৱাৰ লগতে প্ৰসাদৰ ব্যৱস্থা কৰা হয় ৷ এনে সময়ত প্ৰসাদক কেন্দ্ৰ কৰি বৈষ্ণৱপ্ৰাণ ৰাইজ শংকিত হৈ পৰাতো স্বাভাৱিক ঘটনা ৷