औरंगाबाद : विधानसभेचे माजी अध्यक्ष , फुलंब्रीचे भाजप आमदार हरिभाऊ बागडे यांनी नुकताच विधानसभा निवडणूक न लढवण्याचा निर्णय जाहीर केला . ७५ वर्षांच्या वरील व्यक्तींना उमेदवारी न देण्याचे भाजपचे धोरण आहे . याची जाण असल्याने २०२४ मध्ये ८० व्या वर्षात पदार्पण करणाऱ्या बागडेंनी हा निर्णय व्यक्तिगत पातळीवर जाहीर केला . त्यामुळे आता या मतदारसंघावर दावा असणाऱ्या भाजपच्या दुसऱ्या फळीतील इच्छुकांना मनातून आनंद झाला . पण सामान्य कार्यकर्त्यांकडून मात्र हा निर्णय मागे घेण्यासाठी बागडेंकडे आग्रह धरला जात आहे . आ . बागडेंच्या कॅनॉट येथील कार्यालयात शुक्रवारी ( २८ ऑक्टोबर ) औरंगाबाद आणि फुलंब्री तालुक्यातील कार्यकर्त्यांनी गर्दी केली होती . निवृत्तीचा निर्णय मागे घ्या , असे साकडे कार्यकर्ते घालत होते . मात्र ‘ आमदार नसलो तरी पक्षाचा कार्यकर्ता म्हणून आपण जनसेवेत सक्रिय राहणार आहोतच , ' असे सांगून बागडे कार्यकर्त्यांची समजूत घालत होते . निवडणुकीच्या दीड - दोन वर्षे आधीच निवृत्तीची घोषणा केल्याने कार्यकर्त्यांची मानसिकता तयार होईल . हा निर्णय आपला वैयक्तिक आहे . पक्ष जो अंतिम निर्णय देईल तो आपल्याला मान्य असेल , असेही बागडेंनी नमूद केले