ৰঙিয়া, ২ আগষ্টঃ অহা ২০ আগষ্টৰ পৰা ২০ চেপ্টেম্বৰলৈ ৰূপায়িত হ'বলগীয়া ‘’অৰুণোদয় মাহ’’ উপলক্ষে ৰঙিয়া মহকুমাৰ জৰীপকাৰী গোটৰ সদস্য আৰু তত্ত্বাৱধায়কসকলৰ বাবে আজি প্ৰশিক্ষণ কাৰ্যসূচীৰ আয়োজন কৰা হয়। ৰঙিয়াৰ হৰদত্ত-বীৰদত্ত ভৱনত অনুষ্ঠিত এই প্ৰশিক্ষণ কাৰ্যসূচীৰ আনুষ্ঠানিকভাৱে শুভাৰম্ভ কৰে কামৰূপৰ অতিৰিক্ত উপায়ুক্ত তথা ৰঙিয়াৰ ভাৰপ্ৰাপ্ত মহকুমাধিপতি জাৱিৰ ৰাহুল সুৰেশে। উল্লেখযোগ্য যে দেশৰ ভিতৰতে বৃহত্তম হিতাধিকাৰীলৈ প্ৰত্যক্ষ লাভালাভ হস্তান্তৰ আঁচনিৰূপে পৰিগণিত হোৱা 'অৰুণোদয়' আঁচনিৰ অধীনত ৰাজ্যখনৰ প্ৰায় ২০ লাখ হিতাধিকাৰীক সামৰি লোৱা হৈছে। কামৰূপ জিলাৰ সহকাৰী আয়ুক্ত জলী দাস আৰু ৰঙিয়াৰ সহকাৰী আয়ুক্ত অম্লান বৈশ্যই প্ৰদান কৰা এই প্ৰশিক্ষণ কাৰ্যসূচীত প্ৰশিক্ষাৰ্থীসকলৰ বাবে প্ৰস্তুত কৰা এক প্ৰেজেন্টেশ্যনো প্ৰদান কৰাৰ লগতে জৰীপ কাৰ্য চলোৱাৰ সময়ত ব্যৱহাৰ কৰিবলগীয়া এপ্লিকেশ্যনৰ প্ৰয়োগ তথা অংশগ্ৰহণকাৰীসকলে মানি চলিবলগীয়া নিয়মাৱলী সম্বন্ধে আলোকপাত কৰা হয়।